Ministria ruse e Mbrojtjes ka njoftuar të mërkurën, për fillimin e stërvitjeve ushtarake të të ashtuquajturës “Forcë Raketore Strategjike”.
Stërvitjet përfshijnë raketat balistike ndërkontinentale “Yars”, të cilat janë gjenerata e re e raketave, të testuara për herë të parë në vitin 2007, shkruan BBC-ja të mërkurën. Sipas Rusisë, ato mund të mbërrijnë SHBA-në.
Ushtria ruse thotë se stërvitjet, të cilat po zhvillohen në rajonin e Ivanovës pranë Moskës, përfshijnë rreth 1.000 veta personel shërbimi dhe më shumë se 100 automjete.
Raketat, sipas njoftimit, nuk do të lëshohen. Stërvitjet përbëhen nga patrullimet, ngritja e sistemeve raketore dhe mbrojtja e tyre nga sulmet.
Manovrat u bën të ditura disa orë pasi SHBA-ja tha se do të furnizonte ukrainasit me sisteme të avancuara raketash, megjithëse njoftimi për shtyp i ushtrisë ruse nuk u referohej lajmeve nga Washingtoni.
