Manfred Weber do të jetë në të ardhmen në krye të familjes më të madhe europiane të partive konservatore, PPE.
49-vjeçari nga Gjermania të martën në mbrëmje u zgjodh në kongresin e PPE në Roterdam të Holandës pa asnjë konkurrent me 89 përqind të votave si president i organizatës kristiandemokrate, ku bën pjesë dhe Partia Demokratike.
E pranishme në kongresin e PPE ishte dhe deputetja demokrate Albana Vokshi, e cila përmes një postimi në rrjetet sociale ka uruar Weber.
“Urova z. Manfred Weber që u zgjodh President i PPE me 447 vota! Është koha e PPE”, shkruan Vokshi në FB, krahas një foto të postuar, ku shfaqet me kreun e ri të PPE.
