Një tentativë vrasje e ndodhur 25 vite më parë në Fier, është arritur të zbulohet nga policia dhe prokuroria e Fierit, falë rrëfimit që ka bërë vetë i dëmtuari, K. Xh.
Megjithëse në atë periudhë trazirash, ku strukturat hetimore ishin mjaft të dobëta, policia kishte nisur hetimet për këtë tentativë vrasje, me qëllim zbardhjen e autorit të krimit.
Në vitin 1998, policia ka zbuluar se autor i këtij krimi të kryer me armë zjarri kallashnikov, ka qënë Rapi Muço, i cili në ‘98 është arrestuar nga blutë e Fierit. Çështja ndaj Muços ka shkuar në gjyq, por si pasojë se mosgjetjes së personit të plagosur pasi nuk ndodhej në Shqipëri, prokurori i çështjes është detyruar të tërheqi aktet hetimore dhe më pas ka bërë pezullimin e çështjes penale. Si pasojë e kësaj situate, njëherësh është bërë dhe lirimi nga qelia i Rapi Muços.
Por 25 vite pas kësaj ngjarje, çështja është rihapur sërisht nga prokuroria e Fierit. Personi që prokuroria e Fierit, e kërkonte në 1998 si dëshmitar në gjykatë, është shfaqur në polici në muajin Maj 2022, ku ka deklaruar me vullnetin e lirë se njeriu që e ka plagosur me automatik në fshatin Mbrostar Urra, ishte pikërisht, Rapi Muço.
Ai u ka thënë policëve të krimeve kundër jetës se goditja me armë është kryer nga një distancë e vogël dhe ka marrë 4 plumba në trup. Si pasojë e plagëve të marra ai ka shkuar në Greqi, duke ju nënshtruar disa operacioneve kirurgjikale, pasi plumbat i kishin lënë shumë dëmtime. Largimi në Greqi dhe gjëndje jo e mirë shëndetësore,ka bërë që ai të shkëpuste kontaktet me strukturat hetimore.
Por pas 25 vite nga ngjarja, ai u kthye duke rrëfyer se njeriu që e ka qëlluar në 24 qershor 1997, ishte Rapi Muço. Si pasojë e dëshmisë së tij, prokurori Çlirim Sino, ka rihapur hetimin e kësaj dosje, duke urdhëruar policinë të kryerë arrestimin e menjëhershëm të Rapi Muços.
Tashmë ky i fundit do i nënshtrohet një procesi të dytë gjyqësor, për akuzën e “Vrasjes me paramendim” kryer në bashkëpunim mbetur në tentativë dhe “Mbajtja pa lejë të armëve të zjarrit”, ku përballë tashmë do ketë dhe K.XH, që tentoi ta vriste në qershor të 1997. /Oranews/
