Tre anëtarë të familjes Kola në Fushë Arrëz humbën jetën pasditen e së shtunës si pasojë e kontaktit me rrymën elektrike.
Prendushe Kola, 43 vjeç, dhe dy vajzat e saj Sidorela Kola 19 vjeç dhe Emiljana Kola 16 vjeç, janë viktimat e ngjarjes së rëndë, ndërsa familjen Kola e ka pllakosur zia.
Familja Kola njihej si një nga familjet më të respektuara në zonë, por pasditja e 28 majit, ka rezultuar fatale për 3 pjesëtarët e saj.
Ëndrrat e 19-vjeçares Sidorela, e cila ishte studente në Durrës, por u kthye në familje për dy ditë pushime, u prenë në mes.
Të njëjtin fat patën edhe motra e saj Emiljana, 16-vjeçarja e cila ishte në shkollën e zonës, dhe nëna e tyre Prendushe e cila punonte për të mbajtur familjen.
Nga raportimet e para mësohet se ngjarja tragjike ka ndodhur ndërsa 16-vjeçarja po lahej në dush ka rënë në kontakt me rrymën elektrike, në kushte ende të pazbardhura. Duket se ajo ka kërkuar ndihmë, ndërsa ka tentuar tia afrojë e motra, Sidorela, e cila sapo ka prekur dorezën e derës ka rënë pa ndjenja. Në ndihmë ka shkuar edhe Prendushja, nëna e dy vajzave, e cila është goditur po nga rryma elektrike.
Pas ngjarjes tragjike, raportohet se kanë ndërhyrë fqinjët e familjes Kola, të cilët pohojnë se rryma elektrike ka goditur pothuajse të gjithë pallatin. Nuk dihet ende se çfarë ka ndodhur në banesën e familjes Kola apo në të gjithë godinën ku ata kishin hyrjen e apartamentit dhe ndoshta një hetim i thelluar mund të zbardhë ngjarjen e rëndë.
Fqinjët shprehen se familja ishte e varfër, ndërsa punonte vetëm e ema për të mbajtur fëmijët, ndërsa bashkëshorti ishte i papunë.
Prendusha Kola ishte nënë e 4 fëmijëve, dy vajza dhe dy djem të mitur, të cilët nuk ndodheshin në banesë në momentin e tragjedisë.
“Kanë qenë njerëz të mirë, familje e mirë. Gruaja punonte. Kanë qenë të varfër, të lodhur kanë qenë. Shtëpi, si shtëpitë e fshatit, aty i kanë. Kanë ardhur këtu tek pallatet e shtetit, të lodhur janë. Ka lënë dy djem dhe burrin. Djemtë janë të vegjël”, thotë një banore.
“Boll njerëz të urtë. Familje me halle, por të mrekullueshëm. Duke jetuar me gjak të zemrës. Kanë dhe dy djem”, tha një tjetër banore.
