Lajmi për vdekjen e ish-presidentit të Republikës së Shqipërisë, Bujar Nishani, është pasqyruar gjerësisht edhe në mediat europiane. Kryesisht në ato italiane, portugeze dhe spanjolle. ANSA në artikullin kushtuar ish-kreut të shtetit shqiptar ka bërë një rezyme të jetës së tij politike.
Lajmi i ANSA-s:
Bujar Nishani, ish-presidenti i Shqipërisë (2012-2017) është ndarë nga jeta sot në moshën 55-vjeçare. Nishani ndërroi jetë në një spital në Gjermani ku ishte shtruar mbi një muaj më parë, pas komplikimeve në mushkëri pas Covid.
Ish-kreu i shtetit ka qenë deputet në dy legjislatura, si deputet i Partisë Demokratike, formacioni kryesor i qendrës së djathtë. Gjatë qeverisjes së ish-kryeministrit Sali Berisha ka mbajtur postin e ministrit të Drejtësisë dhe më pas të Brendshëm.
The Washington Post shkruan se Ish-presidenti shqiptar Bujar Nishani, i cili u kritikua shpesh për përkatësinë e tij politike të qendrës së djathtë nga koalicioni i majtë, vdiq pas një problemi të rëndë shëndetësor.
