Disa muaj më parë, u shfaqën si armiq të përbetuar. Ndërsa sot pozuan të buzëqeshur krah njeri-tjetrit. Protagonistët janë kreu i FSHF-së Armand Duka dhe kryetari i Bashkisë së Tiranës Erion Veliaj.
Të dy ishin prezent në një aktivitet nga qendra e Tiranës, në kuadër të finales së Konferencë Ligë, që zhvillohet mbrëmjen e nesërme në Air Albania. Kupa diskutohet mes italianëve të Romës dhe holandezëve të Fejnord.
Përplasja
Disa muaj më parë, para zgjedhjeve për kreun e ri të Federatës Shqiptare të Futbollit, mes Dukës dhe Velijt plasi një luftë jo e vogël. Kryebashkiaku i Tiranës hodhi akuza të forta ndaj Armand Dukës. Epitete si hajdut e të ngjashme si këto ishin frazat e preferuara të Veliaj në atë periudhë. Po ashtu, u angazhua personalisht në takime me personazhe që kishin fuqi vote në zgjedhjet për Presidentin e FSHF-së. I famshëm është takimi me delegatët e Shoqatës së Futbollit Tirana, ku spikati fraza se “i kishte b*let prej hekuri”.
Armand Duka, nga ana tjetër, akuzoi për ndërhyrje politike në zgjedhjet e futbollit. I vëllai i tij madje, politikani Agron Duka, akuzoi se dora e Veliajt qëndronte pas kontrolleve tatimore që u kryhen asokohe në një biznes privat të kreut të FSHF-së. Madje, ai ngriti dyshime se Veliaj mund të fshihet edhe pas vënies së eksplozivit në banesën e Armand Dukës në Durrës, në muajin Janar. Ngjarje kjo që solli në Shqipëri edhe kreun e UEFA-s, Aleksandër Ceferin.
Veliaj krah Dukës
Këtë të Martë, teksa u shfaqën në podiumin e krijuar enkas në qendër të kryeqytetit, u duk sikur mes të dyve nuk ka ekzistuar ndonjëherë një luftë të tillë. Madje, Veliaj shpalosi aftësi të larta teatrale teksa gjatë ligjëratës së tij, përmendi edhe bashkëpunimin mes Bashkisë së Tiranës dhe FSHF-së së drejtuar nga Duka për organizimin e finales.
“Qëllimi i organizimit bashkë me federatën është që kujtimet ti kemi përgjithmonë”, u shpreh Veliaj.
“Ashtu si tha dhe Presidenti shpresoj që ata që kanë ardhur për herë të parë në Tiranë shpresoj që të kthehen si turistë”, tha po ashtu kryetari i Bashkisë së Tiranës.
