Në kulmin e hetimeve që po zhvillon Prokuroria e Posaçme SPAK, për një seri ekzekutimesh me pagesë në disa qytete, një tjetër dosje që flet për vrasjen e një të riu në Peqin, pritet të transferohet nga prokuroria e Elbasanit në SPAK.
Ora News mëson se bëhet fjalë për ekzekutimin e Albi Bashaliut, ngjarje kjo e ndodhur në 27 dhjetor 2021 në fshatin Gjoçaj të Peqinit, ku persona të maskuar vranë me armë zjarri, 32-vjeçarin.
Babai i Albi Bashaliut, Mustafai, së fundi i është drejtuar me një kërkesë prokurorisë së Elbasanit, duke shprehur pëlqimin e tij që dosja e vrasjes së të birit të mos vijohet të hetohet në Elbasan, por nga prokuroria e Posçme SPAK.
Mustafa Bashaliu, duke hedhur dyshime se vrasja e të birit është kryer me pagesë dhe nga emrat e arrestuar së fundmi nga SPAK, ka shfaqur dëshirën që dosja hetimore ti bashkohet hetimeve që aktualisht SPAK-u po kryen për bandën e vrasësve me pagesë.
Pritet që në ditët në vijim, prokuroria e Elbasanit të dalë me një vendimarje rreth kësaj dosje, nëse do e transferojë në SPAK ose jo.
Albi Bashaliu, njihej në zonë si person me precedentë penalë, pasi në vitin 2017 ai ka qëlluar me automatik në drejtim të dy personave, por pa mundur ti vrasë ata.
Ndërsa sipas prokurorisë, ngjarja e vrasjes së Albi Bashalit ka si motiv hakmarrjen, pasi vëllai i viktimës Leonard Bashaliu, 6 muaj para se të vritej Albi, ka ekzekutuar me armë zjarri Ylber Xhahysën, ku si shkak ka shërbyer një konflikt për gërvishtjen e makinave.
Aktualisht Leonardi ndodhet në burg, por vëllai tjetër i tij është vrarë, pikërisht në lokalin e fshatit në sy të disa prej banorëve të fshatit Gjoçaj.
Policia e Elbasanit vrapoi në banesën e të afërmve të Ylber Xhahysës, por të gjithë anëtarët ishin në shtëpi në momentin kur ka ndodhur krimi i rëndë.
Një ditë pas ndodhjes së krimit, policia gjeti të paprekur në aksin rrugor Gosë-Vilbashtovë të Rrogozhinës, makinën e viktimës që vrasësit ia rrëmbyen pas ekzekutimit.
Autorët janë detyruar ti marrin makinën viktimës pasi mjeti i tyre pësoi difekt dhe në këto kushte dy personat e dogjën makinën në vendgjarje. /Oranews/
