Agjencia e Mbikqyrjes Policore (AMP) deklaroi këtë fundjavë se ka nisur një operacion të gjerë për të identifikuar efektivët blu që mund të kenë dekonspiruar hetimin masiv të SPAK-ut, “Golden Bullet”.
Por, kur priteshin rezultate për identifikimin e dekonspiruesve të grupeve kriminale, AMP njoftoi se kishte ndaluar një punonjës policie, duke udhëtuar nën efektin e lëndës narkotike “canabis sattiva”.
Sipas njoftimit zyrtar, “është arrestuar në flagrancë të punonjësit të policisë: – Inspektor Altin Bega, 50 vjeç…për arsye se më datë 21.05.2022 është ndaluar nga Shërbimet e Qarkullimit Rrugor Tiranë dhe nga testi i shpejtë për prezencën e alkoolit dhe lëndëve narkotike ai ka rezultuar pozitiv në treguesit që i korrespondojnë prezencës së Cannabis Sattiva dhe negativ në përqindjen 0.00 e alkoolit”.
Me këtë rast, Agjencia e Mbikqyrjes Policore i bëri një reklamë më tepër pajisjes së re që është në përdorim të policëve në Tiranë, një aparat që identifikon narkotikët në organizmin e drejtuesve të mjeteve.
Por, në rastin e inspektorin Altin Bega, aparatura ka pasur atë që në jurisprudencë konsiderohet si “lajthitje në objektiv”.
“Boldnews.al” ka mësuar se efektivi Bega, pak para arrestimit, ka kryer një ndërhyrje kirurgjikale në hundë.
Dhe, ajo që pajisja më e rë e Agjencisë së Mbikqyrjes Policore e konsideron si “prezencë të lëndës narkotike”, nuk është gjë tjetër veçse mbetjet e patretura ende nga organizmi të narkozës së përdorur gjatë ndërhyrjes kirurgjikale.
Burime nga Policia e Tiranës deklaruan për “Boldnews.al” se inspektori Bega u ka shpjeguar kolegëve të tij që po e prangosnin se nuk ka përdorur lëndë narkotike dhe se sapo kishte dalë nga një farmaci, ku kishte marrë medikamente pas operacionit në hundë.
Por, Shërbimet e Specializuara e kanë prangosur, pasi i kanë besuar më shumë “lodrës” më te re të Policisë, aparatit, që tregonte se në organizmin e inspektorit të policisë kishte “prani të canabis sattiva”.
Tashmë, efektivi i arrestuar në flagrancë duhet të përballë të vërtetën e tij me atë të aparatit, për të cilin nuk ka asnjë informacion publik nëse është i kalibruar dhe, për më tepër, nuk dihet nëse ka aftësinë të ndajë lëndën narkotike nga qetësues të ndryshëm mjekësorë, përfshirë edhe narkozën.
Ky rast ngre pikëpyetje edhe më të gjera mbi këtë aparat të ri në duart e policisë.
Në rast se pajisja konsideron “drogë” çdo lloj ilaçi për qetësimin e dhimbjeve, atëherë dhomat e izolimit do të mbushen me shoferë që përdorin medikamente të tilla për diabetin, dhimbjet e trupit, dhimbje koke apo dhëmballe, e të tjera të ngjashme. /Boldnews.al/
