Arben Mërkuri, 48 vjeç, është personi që ka humbur jetën mbrëmjen e së mërkurës në qendër të Sukthit.
Viktima ka marrë dy plumba që i prekën organet jetësore, ndërsa viktima ka humbur jetën në spitalin e Durrësit.
Ai ndodhej në dyqanin e tij kur është qëlluar me breshëri në rrethana që ende nuk dihen. Arben Mërkuri, i cili raportohet se kishte precedent penal në fushën e narkotikëve, përdorte edhe mbiemrin Ismaili. Nga të dhënat e para mësohet se autorët mund të kenë përdorur një automjet GLE ngjyrë gri. Gjithashtu raportohet se viktima thirrej edhe me emërtimin “Maneci”.
“Në qendër të Sukthit, një shtetas ende i paidentifikuar ka qëlluar me armë zjarri automatik, në drejtim të dyqanit të shtetasit Arben Mërkuri.(I.), 48 vjeç.
Për pasojë shtetasi A. M.(I.) u plagos në gjendje të rëndë dhe si pasojë e plagëve të marra ndërroi jetë në spital.
Shërbimet e Policisë kanë rrethuar zonën dhe vijon krehja e saj, për te bërë të mundur kapjen e autorit.
Grupi hetimor, nën drejtimin e Prokurorisë, ndodhet në vendngjarje dhe po punon për fiksimin e çdo prove të vlefshme që do t’i shërbejë hetimit, me qëllim identifikimin dhe kapjen e autorit”, njoftoi policia në një komunikatë pak minuta pas ngjarjes.
Mërkuri është një emër i njohur për policinë. Ai u ndalua bashkë me dy persona të tjerë, pas dhunës së ushtruar ndaj biznesmenit libanez të ndërtimit, Faadi Mitri.
Referuar ngjarjes, Mërkuri është ndaluar në vitin 2016. Biznesmeni amerikano-libanez u dhunua fizikisht pranë kryqëzimit të Laknasit, pasditen e 10 shtatorit të 2016, ndërsa ndalimi i të dyshuarve si autorë u bë 4 ditë më pas.
