Nga Boldnews.al
Kryetari i Bashkisë së Tiranës, Erion Veliaj, ironizoi Strukturën e Posaçme Kundër Korrupsionit (SPAK), në një intervistë televizive nga Nju Jorku, ku gjendet për ceremoninë e përurimit të një rruge me emrin “Skënderbeu” në shtetin e rëndësishëm amerikan.
Ai deklaroi se prokurorët e posaçëm po hetojnë Bashkinë për një “WC” gjatë punimeve të ndërtimit të shkollës “Sami Frashëri”.
Në Tiranë, përfaqësuesja e Uashingtonit nuk toleron askënd të kritikojë SPAK-un, për të cilin në kryeqytetin shqiptar përmendet shpesh se është “produkt amerikan”.
Por, Veliaj, është ndër më të “guximshmit”, që i lejon vetes të kritikojë Prokurorinë Speciale nga Shtetet e Bashkuara, duke zbuluar hipokrizinë e diplomatëve amerikanë në Tiranë.
Kryebashkiaku shkoi në Shtetet e Bashkuara, pas një serie fotosh me plot buzëqeshje me ambasadoren amerikane në Tiranë, e cila e thekson shpesh që përfaqëson Presidentin Biden dhe ky i fundit është i vendosur për të luftuar korrupsionin në Ballkan.
“Tallja amerikane” e Veliajt erdhi në vigjilje të dy-vjetorit të shembës së Teatrit Kombëtar.
Në 17 Maj 2020, në kulmin e masave bllokuese kundër pandemisë Covid-19, Veliaj përdori dhunën shtetërore kundër godinës simbol dhe dhjetra artistëve protestues, të cilët prej muajsh ishin ngritur në mbrojtje të Teatrit Kombëtar.
Komuniteti i artistëve protestues e konsidero aktin e Erion Veliajt një “krim shtetëror” dhe ka dorëzuar një seri kallëzimesh kundër kryebashkiakut të Tiranës pranë Prokurorisë Speciale, SPAK.
Pas më shumë se dy vitesh, prokurorët specialë nuk kanë guxuar të shqetësojnë Veliajn, i cili duket se ka mbështetjen plotë buzëqeshje të Yuri Kim.
Në janar të vitit 2021, një hetim i anti-mafias italiane zbuloi përgjime të shumta, në bazë të të cilave kuptohej qartë se “Ndrangheta” kishte shtrirë gjerësisht trupin e saj në lejet e ndërtimit të shumë-katëshve në Tiranë.
Struktura e Posaçme Anti-Korrupsion lëshoi një deklaratë të mekur, ku u shpreh se do të bashkëpunonte me agjencitë homologe në Itali për të hedhur dritë mbi këtë skandal.
Prej më shumë se një viti, asnjë gjethe nuk ka lëvizur nga ky hetim, i cili duhet të kishte të dyshuar kryesor Erion Veliajn, si autoriteti përgjegjës për dhënien e lejeve të ndërtimit në Tiranë.
Veliaj është personazh kyç edhe në “aferën e inceneratorit të Tiranës”. Ai është personi që i ka dhënë rrugë koncesionit 120 milionë euro për Klodian Zoton dhe grupin e tij financiar, një pjesë prej të cilëve në arrati.
Por, nga SPAK-u nuk ka asnjë sinjal që do të marrë seriozisht hetimin e Djegësit të Tiranës dhe rrjedhimisht, nuk ka asnjë shqetësim për Erion Veliaj.
E, ndaj, ky i fundit, nëpërmjet mikrofonit të Sokol Ballës, gjen kohën dhe terrenin për të tallur “atë që nuk thuhet” me SPAK-un.
Veliaj i kujton prokurorëve specialë se po hetojnë bashkinë e tij për një “WC”.
Ka shumë të drejtë që tallet.
SPAK-u ka shumë lëndë ndaj tij, por ka zgjedhur që të orientojë hetimin drejt “WC”-së.
