Prokurori i Përgjithshëm Olsian Çela ka raportuar sot në Komisionin Parlamentar të Ligjeve, lidhur me punën e bërë nga institucioni që ai drejton për vitin 2021.
Çela u ndal tek disa problematika të prokurorive në vend.
Gjatë seancës dëgjimore, Çela është ndalur edhe tek hetimet e mundshme për deputetë të Kuvendit të Shqipërisë. Kryeprokurori nuk ka dhënë detaje, ndërsa tha se janë 12 çështje që kanë shkuar për korrupsion zgjedhor në SPAK.
“Sa i përket deputetëve janë të paktën 12 çështje që kanë shkuar për korrupsion zgjedhor në SPAK, por nuk mund të them sot ka apo nuk ka deputetë të përfshirë në korrupsion zgjedhor se ka lidhje me hetimet. Ndërkohë prokuroria e posaçme ka të dhënat e veta që lidhen me subjektet e posaçme apo veprën penale. Do ishte e pasaktë nëse sot u konfirmoja një të dhënë”, theksoi Çela.
