Tirana ka fituar me shifrat 3-1 klasiken e futbollit shqiptar ndaj Vllaznisë, duke mos ndalur hapin e saj edhe pse ka siguruar titullin kampion, duke rrezikuar Europën për ekipin kuqeblu.
Bardheblutë kaluan në avantazh në minutën e 16-të me anë të Taulant Seferit që regjistron golin numër 17 në këtë sezon. Megjithatë, shkodranët reaguan dhe rikthyen baraspeshën teksa shfrytëzuan një autogol të Real Zhivanajt me mbrojtësin bardheblu që devijoi topin gabimisht në portën e tij. Ndërkohë, në fundin e pjesës së parë, Ennur Totre riktheu sërish Tiranën në avantazh me fantazistin që shfrytëzoi një asist të Ismajlgecit dhe kaloi me zgjuarsi portierin Zogovic.
Ndërkaq, në fraksionin e dytë, bardheblutë gjetën edhe golin e tretë me anë të Redon Xhixhës që shënoi për herë të 14 në këtë sezon. Ndërkohë, të dyja skuadrat të dyja skuadrat e mbyllën ndeshjen me 10 vetë pas daljes me karton të kuq të Zhivanajt dhe Gurishtës.
