Nga Boldnews.al
Ambasadorja amerikane në Tiranë, Yuri Kim, dha një shfaqje butaforike në “Open” të Eni Vasilit mbrëmjen e së Enjtes, kur raportoi me detaje statistikat nga aktiviteti i Prokurorisë Speciale për vitin 2021, të njëjtat shifra që pak orë më parë kreu i SPAK-ut, Arben Kraja, i paraqiti para Këshillit të Lartë të Prokurorisë.
Në mbledhjen e KLP-së, anëtarët kërkuan nga Kraja qëndrimin e tij se përse struktura më e mbështetur dhe më e specializuar, nuk ka arritur ende të bind opinionin publik për efikasitetin e saj.
Ndërsa ambasadorja Kim nuk ka pse të përballet me pyetje të kësaj natyre, përsa kohë nuk ka përgjegjësi për aktivitetin e përditshëm të prokurorëve.
Megjithatë, nën argumentin se përfaqëson Shtetet e Bashkuara, pra vendin që ka investuar miliona për “Reformën në Drejtësi” në Shqipëri, diplomatja Kim ka marrë përsipër edhe rolin e ruajtjes dhe forcimit të imazhit të SPAK-ut.
Ajo po tenton të bindë opinionin publik shqiptar për rezultate të larta të prokurorëve specialë, ndërkohë që populli “i pagdhendur” shqiptar nuk ndan ende të njëjtin mendim me të.
Ambasadorja Kim deklaroi në emisionin “Open”: “Gjykatës dhe prokurorë u dënuan nga gjykata e shkallës së pare për kundravajtjen penale të korrupsionit, s’po përmend emra, mund t’i kërkoni vetë”.
Për saktësi informacioni, gjatë jetës 3-vjeçare të SPAK-ut, vetëm një gjyqtare është dënuar për korrupsion-Enkelejda Hoxha. Ka disa raste të tjera sporadike, të cilat nuk janë “korrupsion”, sipas kuptimit formal të tij.
Ndërkohë, siç ka raportuar më herët “Boldnews.al”, para krijimit të SPAK-ut, ka pasur një numër më të lartë të gjyqtarëve e prokurorëve të arrestuar e dënuar për korrupsion.
“Tri kryebashkiakë janë në gjyq tani”, tha ambasadorja Kim, një shifër që nuk sjell asgjë të re në krahasim me historinë e drejtësisë në Shqipëri para ardhjes së saj në Tiranë.
Diplomatja vijoi më tej: “Po ju them disa statistika vetëm nga viti 2021: u kryen 715 procedime penale kundër 519 të dyshuarve; 239 persona të akuzuar u çuan në gjyq, nga të cilët 84 për krim të organizuar, 96 për korrupsion, 59 për kundravajtje të tjera; u dënuan 230 të pandehur, nga të cilët 94 për krim të organizuar dhe 136 për korrupsion dhe kundravajtje të lidhura me të”.
Këto shifra, të artikuluara nga ambasadorja e Shteteve të Bashkuara, tingëllojnë bukur në një emision televiziv.
Megjithatë, mjafton të krahasohen me mesataren vjetore të ish-Prokurorisë për Krime të Rënda dhe llogaritë e SPAK-ut nuk do të dalin aq rozë.
“Janë sekuestruar dhe transferuar tek shteti asete me vlerë mbi 70 milionë euro”, vijoi më tej diplomatja Kim operacionin e përmirësimit të imazhit të SPAK-ut.
Duke iu rikthyer historisë së para pak viteve, atëherë kur prokurorët specialë ende nuk e kishin marrë këtë emër, sërish llogaritë e ambasadores nuk dalin edhe aq mirë.
Vetëm në një hetim, prokuroria e Vlorës në vitin 2017 sekuestroi prona me vlera mbi 300 milionë euro.
Në një tjetër rast, prokuroria periferike e Kavajës konfiskoi dhe kaloi në favor të shtetit toka në Vilë-Bashtovë, me vlerë mbi 200 milionë euro.
Në Fier, “drejtësia e vjetër” konfiskoi mbi 2 milionë metra katrorë tokë në plazhin e Semanit.
“Çështja kundër grupit të Emiljano Shullazit…”, kujtoi ambasadorja. Thjesht për rifreskim memorie, Shullazi është arrestuar e dënuar për një ngjarje të vitit 2016, kur ekzistonte Prokurora për Krime të Rënda.
Tashmë, Shullazi e të tjerë janë të arrestuar për dy ngjarje të rënda, të ndodhura në vitin 2015. Megjithatë, ata nuk janë të dënuar.
“Janë dënuar nga SPAK grupi famëkeq i Avdulajve të Durrësit”, theksoi ambasadorja, duke iu referuar asaj që njihet publikisht si dosja 339.
Por, diplomatja, e cila këmbëngul për luftën kundër korrupsionit në Shqipëri, nuk kishte asnjë fjalë për të tjerë personazhe të kësaj dosjeje. Janë ata që bënë “tërmet” në zgjedhjet lokale të Dibrës, në vitin 2016.
Lista e të përgjuarve dhe të përfshirë në atë dosje nis me kryeministrin Edi Rama, ish-kryebashkiakun e Durrësit, Vangjush Dako, i cili është edhe në “listën e zezë” të Departamentit të Shtetit, e vijon me Ulsi Manjën, Damian Gjiknurin e një aradhë të gjatë zyrtarësh të “Rilindjes”, të gjithë të paprekur nga SPAK-u.
“Kur thoni se shkojnë pas të vegjëlve prokurorët e SPAK-ut, ju vë në dukje këtë: ish-Ministri i Brendshëm, ish-Prokurori i Përgjithshëm”, vijoi më tej ambasadorja Kim, duke iu referuar Saimir Tahirit dhe Adriatik Llallës.
Të dy këto raste, SPAK-u i gjeti në fazën e gjykimit e ndaj nuk kanë asnjë meritë proceduriale.
“Një ish-Ministër i Mjedisit, një deputet në detyrë, dhe shumë zyrtarë të tjerë, në ministri të ndryshme janë nën hetim për çështjen e inceneratorëve”, u shpreh në fund të raportimit ambasadorja Kim.
Lefter Koka dhe Alqi Bllako, të arrestuar në dyshimet për aferën e inceneratorëve, kanë të gjithë të drejtën e Zotit dhe të Kushtetutës që të pretendojnë pafajësi. Rastet e tyre nuk mund të konsiderohen sukses, të paktën për momentin.
Ashtu siç nuk mund të konsiderohet sukses hetimi për inceneratorët, kur në radarin e SPAK-ut mungojnë shumë emra, me të cilët ambasadorja Kim shtyn ditët e lumturisë në Tiranë.
Edi Rama, Damian Gjiknuri, Ëngjëll Agaçi, Arben Ahmetaj, Erion Veliaj e të tjerë e të tjerë kanë emrat dhe firmat në “skandalin e inceneratorëve”.
Por, natyrisht, askush nuk merret me ata. Prokurorët e SPAK-ut nuk janë aq të fuqishëm sa të merren me “peshat e rënda”, aq më tepër kur fytyrat e tyre gjenden shpesh në kronikat ditore në krah të ambasadores Kim.
