Ish-Kryeministri Sali Berisha akuzoi Kryeministrin Edi Rama se po krijon vetëm skema se si të vjedhë, ndërkohë që ushtron presion ndaj organeve të drejtësisë, përfshi edhe SPAK.
Berisha i konsideroi deklaratat e Ramës si të denja vetëm në Korenë e Veriut, ndërsa sipas tij ai synon që të tërheqë vëmendjen nga problemi që po përballen sot shqiptarët, rritjen e çmimeve.
“Edi Rama dhe ministrat e tij po marrin pronat publike nga kepi i Stillos dhe në çdo vend tjetër. E ndërkohë që këta vjedhin, shqiptarët po varfërohen dhe 50 % e të ardhurave të tyre shkojnë vetëm për ushqime, pasi çmimet janë rritur 100%”, tha Berisha.
Ai tha se Rama është në panik, ndaj dhe ai sulmon drejtësinë. Berisha tha se referuar shkresave zyrtare, për inceneratorët, provohet se Engjëll Agaçi, ka qenë në dijeni të plotë të shkeljeve ligjore të koncensioneve, dhe ia ka paraqitur për miratimin vendimin për inceneratorin e Elbasanit. Sipas Berishës, paligjshmëria arrihet deri aty sa Sekretari i Përgjithshëm i Mafies, përdor termin ka shpallur procedurë, kur nuk kishim ndonjë procedurë të shpallur.
Ai tha se Rama po krijon mekanizma për realizimin e vjedhjeve me firmë e vulë. “Ju duhet ta dini që kaq i ngërthyer është Edi Rama në aferën e inceneratorëve, sa në kohën kur shqiptarët që kanë fituar gjyqet nuk u jepet asnjë qindarkë, Klodian Zotos, Stela Gugalljas dhe Mirel Mvrtirit i jepen rregullisht pagesat nga Arben Ahmetaj”, tha Berisha.
Ai e konsideroi Butrintin një tjetër aferë multi-dimensionale. Berisha tha se në territorin e manastirit po ndërton resortin turistik, miku i Edi Ramës, ku ndoshta edhe ai vetë mund të jetë aksioner.
“Duke uzurpuar pronën e Stillos, laguna e cila është cilësuar si zonë e super mbrojtur, është dhënë për ndërtimin e 620 vilave, ku pa asnjë diskutim lajnë paratë Edi Rama dhe njerëzit e tij”, tha Berisha.
Ish-Kryeministri gjithashtu përmendi aferat me Vilma Nushin dhe Tom Doshin, të cilët i konsideroi si të lidhur tërësisht me Edi Ramën.
“Vuan nga sindroma e problemeve të tjella psiqike, është i trembur. Por një arsye tjetër që ia shkakton frikën është se mori fund loja me opozitën fasadë, me opozitën e trembur. Sot ai ka përballë opozitën e vërtetë, vendi është në revolucion”, tha Berisha. Ai tha se nuk ka ndërmend ti bëjë presion SPAK, por do i kërkojë qytetarëve të mbrojnë pronat publike.
