Kryeministri Edi Rama, nga selia e PS, ka kërkuar nga SPAK që të hetojë politikanët. Rama tha se shqiptarët kanë 35 vjet që presin drejtësi.
Referuar reagimeve lidhur me deklaratat e tij për SPAK, Rama tha se disa thanë që e bëj nga frika, disa e shohin si presion, por e rëndësishme është që SPAK të hetojë korrupsionin e politikanëve.
“Kemi mbështetur SPAK, kemi inkurajuar veprimtarinë hetimore dhe s´kemi bërë asnjë koment mbi punën e këtij institucioni. E kemi treguar se për ne nuk ka të paprekshëm dhe kushdo që me drejtësinë ka një llogari të hapur, derën e partisë e ka të mbyllur”, tha Rama.
Ai gjithashtu ka kërkuar hetimin e prokurorëve dhe gjyqtarëve të larguar nga sistemi i drejtësisë përmes vetting, ndërsa u shpreh se nuk u angazhua në rrugën e kësaj reforme as për ta përdorur politikisht drejtësinë, as për të sulmuar politikisht kundërshtarët, përmes organeve të drejtësisë.
Rama tha se askush nuk do e pengojë SPAK të hyjë në këtë seli (Partisë Socialiste) dhe kjo është zgjedhja e jonë, nuk është as detyrim ndaj SHBA apo BE, as ndonjë kërkesë e tyre që të na detyrojë ne.
“Sa të jem unë në këtë pozicion askush nga ne nuk do të bëjë presion ndaj drejtësisë”, tha Rama, duke shtuar se të kërkosh më shumë nga drejtësia kur vettingu po bën 5 vjet dhe SPAK po mbush 3 vjet, nuk do të thotë të bësh presion, pasi çfarë duhet të thonim për deklaratat e SHBA apo BE kur është kërkuar edhe hapur dhe nominalisht ndëshkimi i politikanëve dhe gjykatësve apo prokurorëve të korruptuar.
