Katër gola në një ndeshje, tripletë në 24 minutat e para të transfertës së Wolverhampton, e treta më e shpejtë e historisë së Premier League.
Ky është Kevin De Bruyne, “qershia mbi tortë” në sezonin e Manchester City që shkatërron edhe “Ujqërit” 5-1 në transfertë dhe e bën titullin një çështje për t’u firmosur në transfertën e radhës në west Ham ose në javën e fundit në shtëpi kundër Aston Villas.
Skuadra e Pep Guardiolës zhvilloi ndeshje me një drejtim në mbrëmjen e së mërkurës ku belgu shkëlqeu në një skuadër që duket se nuk ka nevojë për sulmues edhe pse Sterling shtoi një tjetër gol në minutat e fundit. Me këtë fitore, City rikthehet në +3 nga Liverpool dhe shumë pranë titullit të dytë rresht.
Në ndeshjen tjetër, Chelsea fitoi 3-0 në transfertën e Leeds United duke e zhytur edhe më shumë në zonën e ftohtë skuadrën e shtëpisë.
