Analisti Andi Bushati thotë se Rama i ka bërë të gjitha kritikat ndaj SPAK në siglën e PS-së dhe jo si kryeministër.
Bushati thotë se SPAK është nën kontrollin e Ramës por sulmet lidhen me dyshimet për arrestimin e një ministri.
“Ka hipoteza që Rama ka planifikuar të shesë dhe një ministër tjetër, por që ta çojë në burg duke e mbajtur si mik, i thotë që e shikon s’kam dorë tek SPAK-u”, tha analisti i ftuar në “Euronews Albania”.
Sipas Bushatit, në një kohë kur Rama ka hyrë në vitin e dytë të mandatit të tretë dhe debati duhet të ishte për rritjen e çmimeve dhe produkteve.
“Për të mos u përballur me bilancin katastrofik përdor metodën që përdorin të gjithë autokratët. Shpik një armik, hidhi miletit fabulën e një armiku dhe ne të gjithë merremi me këtë punë”, tha Bushati.
Analisti thotë se kryeministri nuk duhet të sillet si “profesor”, por të japë “llogari me kokën ulur” për të gjitha dështimet dhe gjërat që nuk shkojnë.
