Luçiano Boçi dhe Oerd Bylykbashi janë mandatuar nga Komisioni i Rithemelimit për të diskutuar dhe negociuar me partitë opozitare lidhur me zgjedhjen e Presidentit.
Është ky vendimi i marrë nga Komisioni i Rithemelimit, që u bë i ditur nga ish-Kryeministri Sali Berisha.
Ai tha se Enkelejd Alibeaj nuk ka asnjë tagër për të përfaqësuar PD-në në negociatat për Presidentin e ri, ndërsa e konsideroi atë si një ministër virtual të Edi Ramës.
Berisha tha se opozita nuk do të bojkotojë seancën për zgjedhjen e Presidentit.
Ish-Kryeministri e konsideroi si absurditet propozimin që Presidenti të mos jetë politikë. “Nuk është post ekzekutiv, por është pozicion politik dhe mendoj se çdo parashikim tjetër është i gabuar, nonsens dhe i stisur”, tha Berisha.
Ai u shpreh se kriteret që ka përcaktuar Alibeaj në dokumentin e tij synon zgjedhjen e Presidentit që do Edi Rama.
“Është procesi më serioz më serioz dhe më i rëndësishëm që ka një shtet, u katandis në një proces familjar. Baton Haxhiu del e thotë se Linda Basha është kandidatura më serioze, ndërsa Edi Rama del e u thotë deputetëve që jam unë emri më i propozuar. Pra e kthyen në një proces familjar”, tha Berisha.
