Nga Boldnews.al
Tmerri është pak të thuhet, kur një fuoristradë luksoze, e blerë me gjasë nga paratë e drogës, shtypi në vijat e bardha një çift të rinjsh dhe foshnjen e tyre tre muajshe. Për fatin e mirë (nëse mund të quhet i mirë), fëmija ka shpëtuar pa shumë lëndime, ndërsa çifti i bashkëshortëve ,Arjan dhe Vilma Konomi, vijojnë të jenë në gjendje të rëndë në Spitalin Ushtarak.
Ngjarja ndodhi në Rrugën e Kavajës, në Tiranë, pranë një kompleksi pallatesh. Droga, drejtësia e blerë, fluturimi i mendjes dhe forca e siguruar nga pandëshkueshmëria, u mblodhën të gjitha në një ngjarje, që po quhet si “aksident rrugor”, por vetëm i tillë nuk është. Sipas burimeve të policisë, autori i ngjarjes është Ajas Sulejmani, i cili pasi shkeli semaforin me shpejtësi të lartë dhe shtypi këmbësorët, u largua me shpejtësi për t’i shpëtuar arrestimit.
Disa fakte tregojnë se ky nuk është vetëm një aksident…. Mësohet se Sulejmanit i është hequr patenta tre javë më parë, pikërisht për shkelje të rregullave të qarkullimit, gjithashtu ai ishte në kërkim ndërkombëtar për akuzën e trafikut të lëndëve narkotike. Forca e parasë së fituar në mënyrë të shpejtë dhe të kundraligjshme, blerja e drejtësisë, sado që ajo të kushtojë, frika e policëve të thjesht për tu përballuar me arrogancën e luksit dhe drejtuesit e automjeteve që shprehin dhunë, forcë dhe pushtet, sot sollën një prag tragjedie, që përsëritet e përsëritet.
Kur krimi vihet në kandar dhe fiton pesha e parasë së korrupsionit, fitohet liria për të shkuar deri në çmeduri, që dergjet në rrugët e vendit. Sfida sot për policinë e shtetit nuk është mbushja e blloqeve të gjobave në parkimin poshtë pallateve dhe në rrugicat që mbajnë erën e rëndë të mbetjeve urbane me kazanët kapic. Siguria rrugore nuk vjen as kur gjezdisin me radarë nëpër autostradat e vendit. Sigurisht që kjo është një masë e vlefshme, por jo e gjitha.
Po na vrasin në rrugë në emër të aksidentit rrugor. Por kur ai që e shkakton këtë krim nuk ka leje drejtimi dhe sërish lëviz lirshëm, që shkel rregullat dhe nuk ndëshkohet, e nëse kapet dikush në gjykata a prokurori e sheh jo si autor krimi, por si bankomat për ta zbrazur disi, ngjarje të tilla do të ndodhin.
Automjeti luksoz i siguruar nga krimi, drejtimi i tij pa lejen përkatëse, mosndëshkueshmëria dhe blerja e drejtësisë nuk quhen më aksident, pasi ai autobjet kthehet në një armë dhe nga aksidident duhet cilësuar “vrasje”, apo “tentativë vrasje” me dashje.
Për ngjarje të tilla reagimet janë mësive, pasi gjithkush e mendon veten në një ngjarje të tillë. Shprehet mllef apo mallkim, pa e kuptuar se kapistralli u është hequr këtryre individëve pikërisht nga përgjumja e policisë, arroganca e pushtetit dhe blerja e drejtësisë.
Në vendin e ngjarjes ende ka mbetur në rrugë karroca e foshnjes vetëm tre muajshe. Dy prindërit e tij po luftojnë me jetën në spital. Këtë të diellë pushimi menduan të shëtisnin fëmijën dhe si qytetarë të mirë pritën në trotuar sa të ndizej drita jeshile që të kalonin, pa e çuar në mendje se arroganca e të pushteshmit të veshur me krim do sulmonte me “armën” makinë.
