Është shtyrë për në datën 10 Maj, vendimi për Ergys Malja, adoleshentin që prokuroria e Shkodrës e akuzon si autor të vrasjes së Endri Mustafës në zonën e Livadheve në Shkodër.
Shkak për shtyrjen e vendimit është bërë vetë Ergys Malja, i cili për arsye shëndetësore nuk është paraqitur nga burgu në seancë gjyqësore, duke kërkuar që seanca të shtyhej pasi kërkonte të ishte vetë prezent në dhënien e vendimit.
Nisur nga kjo situatë dhe për shkak se vetë i pandehuri ka dëshiruar të ishte prezent, gjykata ka vendosur shtyrjen e vendimit për në datën 10 Maj 2022.
Malja, akuzohet se ka nxjerrë nga shtëpia Endri Mustafën, i cili tre ditë më vonë u gjet i pajetë në zonën e Livadhes në Shkodër.
Fillimisht i riu ka treguar se vrasjen e ka kryer Ibrahim Lici. Por 1 muaj më pas Ergys Malja, është tërhequr nga ky deklarim, duke treguar se ishte rrahur në polici dhe bërë presion për deklarimin e emrit të tij.
Vetë avokatët e Maljas pretendojnë se i riu është i pafajshëm dhe kërkojnë që ai të deklarohet si i tillë nga gjykata.
/Ora News/
