Një 53-vjeçar është arrestuar nga policia e Tropojës, që bën me dije se në banesën e tij janë gjetur drogë dhe armë.
“Strukturat e DVP Kukës, në bashkëpunim me Komisariatin e Policisë Tropojë dhe Prokurorinë e Rrethit Tropojë, bazuar dhe në informacionet e siguruara në rrugë policore, organizuan dhe finalizuan operacionin policor të koduar ‘Again’, si rezultat i të cilit u bë arrestimi në flagrancë i shtetasit Binak Zharku, 53 vjeç, banues në Bajram Curri, Tropojë”, njoftoi policia.
Sipas të njëjtave burime, gjatë kontrollit të ushtruar në banesën e tij, u gjetën dhe sekuestruan në cilësinë e provës materiale rreth 18 kilogramë lëndë të dyshuar narkotike kanabis, një armë zjarri pistoletë, municion luftarak dhe një aparat celuar.
53-vjeçari akuzohet për veprat penale “Prodhimi dhe shitja e narkotikëve” dhe “Mbajtja pa leje dhe prodhimi i armëve, armëve shpërthyese dhe i municionit”.
Sipas bluve, vijojnë hetimet për identifikimin dhe vënien para përgjegjësisë ligjore të personave të tjerë të implikuar në këtë veprimtari kriminale.
