Fieri është qyteti i parë që i është përgjigjur thirrjes nga Partia Demokratike e cila ka lajmëruar protestë paqësore këtë të shtunë nën moton “Stop vrasjes në komisariate”, pas vdekjes së të riut Ilvi Meta në Kavajë.
Protesta pritet të zhvillohet në orën 20.00 në të gjitha komisariatet e policisë në të gjithë vendin dhe në godinën e Kryeministrisë do të ndizen qirinj.
“Ne orën 20.00 pranë të gjitha komisariateve të policisë në të gjithë vendin do të ndizen qirinj në një protestë të heshtur paqësore nën moton “Stop vrasjes në komisariate”. Në Tiranë qirinjtë do të ndizen tek Kryeministria, po në orën 20.00. Ftojmë mediat në Tiranë dhe në rrethe të ndjekin këtë protestë të heshtur”, shkruhet në njoftimin e PD-së.
31 vjecari Ilvi Meta i dha fund jetës tri ditë më parë në ambjentet e Komisariatit të Kavajës, teksa dyshohet se ka vrarë veten. Në lidhje me këtë lajm të rëndë, është ngritur edhe grup hetimor.
Babai i viktimës, Agim Meta ka thënë për mediat se nuk e beson versionin e policisë, sepse djali i tij nuk kishte probleme.
