Dy turistë polakë humbën jetën këtë të Premte pas një aksidenti rrugor të ndodhur në Kryebushat të Shkodrës.
Sipas një rindërtimi paraprak të ngjarjes, ata po udhëtonin me motor kur janë përplasur me një makinë tip “Volkswagen”. Polakët mbetën të lënduar dhe u transportuan drejt spitalit rajonal, por nuk mundën të mbijetojnë.
“Rreth orës 11:20, në rrugën nacionale Shkodër – Lezhë, në vendin e quajtur ‘Kryebushat’, një automjet tip ‘Volkswagen’, me drejtues shtetasin D.Gj., 27 vjeç, është përplasur me një motomjet, në të cilin udhëtonin 2 shtetas të huaj polakë (turistë). Si pasojë e përplasjes kanë ndërruar jetë drejtuesi i motomjetit, shtetasi W.M., 45 vjeç dhe pasagjerja në motomjet, shtetasja M.M., 42 vjeçe. Drejtuesi i automjetit, shtetasi D. Gj., është shoqëruar në Komisariatin e Policisë Shkodër, për veprime të mëtejshme procedurale. Nga kryerja e alkool-testit ndaj drejtuesit të automjetit, shtetasit D.Gj., ka rezultuar se nuk kishte konsumuar alkool”, thuhet në njoftimin e policisë.
Policia ka mbërritur në vendngjarje dhe siç po ndodh rëndom kohëve të fundit, vetëm mbledh kufomat.
Policët e lëshuar rrugëve veprojnë si banda gjobash dhe jo të parandalojnë krimet apo ngjarjet e rënda që kushtojnë jetë njerëzish dhe prishje të rendit dhe sigurisë së qytetarëve.
Së fundmi kanë ndodhur ngjarje vërtet të rënda në vend që kanë nxjerrë në pah problematikat e theksuara të institucionit për të cilin qytetarët paguajnë taksa që tu garantojë siguri.
Por jo vetëm që kjo nuk ka ndodhur, por policia po akuzohet si krimineli që po vret qytetarët.
Në komisariatin e Kavajës, një i ri humbi jetën në qeli ditë më parë. Sipas hetimeve paraprake të policisë, i riu i vetëvar me lidhësen e bluzës. Por për familjarët ky version nuk qëndron. I ati i 31-vjeçarit Ilvi Meta denoncoi publikisht se i biri ka humbur jetën nga dhuna policore.
Ngjarja tronditëse vjen rreth 1 muaji pas një tjetër ndodhie shokuese po në ambientet e Policisë. Më 26 mars u dogj në dhomën e paraburgimit në Komisariatin e Kamzës 28-vjeçari Arben Mici. Edhe për atë rast u tha se i paraburgosuri i vendosi zjarrin dyshekut të dhomës ku qëndronte, duke lënë të lënduar edhe tre persona të tjerë, mes tyre edhe dy policë.
Akuza ndaj policisë u hodhën edhe për rastin e Elbasanit disa ditë më parë, ku një grua u hodh nga lartësia e banesë duke humbur jetën. E motra e viktimës tha se gruaja kishte denoncuar disa herë në policë dhunën që i shoqi dhe e vjehrra ushtronin ndaj saj, por institucioni që ka detyrim ligjor të parandalojë të tilla ngjarje, edhe këtë herë dështoi.
Lexo edhe:
Kryepolicit me syze dielli e dekorata i vdesin të ndaluarit në komisariate
