Nga Boldnews.al
Nuk është më vetëm një “aksident” i çuditshëm, që ndodh një herë në të rrallë. Vdekjet brenda komisariateve të personave të shoqëruar po ndodhin në mënyrë të frikshme, duke rikthyer edhe një herë problemin e madh të sigurisë në institucionet e Policisë së Shtetit.
Viktima e fundit që në statistikat policore do regjistrohet si “vetëvrasje”, është 28-vjeçari nga Kavaja, Ilvi Stameta, i cili i dha fund jetës në rrethana ende të mistershme, pak orë pasi ishte shoqëruar nën dyshimin si autor i një vjedhje.
Ky është rasti i dytë brenda 40 ditëve që qytetarët humbin jetën në ambientet e komisariateve dhe çuditërisht të dy brenda qarkut të Tiranës. Më 26 mars u dogj në dhomën e paraburgimit në Komisariatin e Kamzës 28-vjeçari Arben Mici. Edhe për atë rast u tha se i vendosi zjarrin dyshekut të dhomës ku qëndronte, duke lënë të lënduar edhe tre persona të tjerë, mes tyre edhe dy policë.
Përtej raportimit si “raste aksidentale”, duket se ka një problem serioz si për kushtet e komisariateve, ashtu edhe për trupën policore që merret me shoqërimin dhe vëshgimin e personave të shoqëruar.
Kreu i Policisë së Shtetit Gledis Nano po çedon shpejt në detyrën që mban. Shpesh del në media, por duke treguar për “punën e madhe” në luftën kundër krimit dhe nuk lë rast pa falenderuar edhe biznesmenë që i falën policisë syze dielli dhe vizita falas për ata që kanë nevojë probleme me shikimin.
Dhuratën e syzeve të errëta mund ta ketë pranuar me xhama të trashë…
Nuk po sheh thelbin e problemeve. Policia duket gjithnjë e më e largët me komunitetin, ku shihen shumë muskuj, por gjithnjë e më pak ekspertë që qytetarët ti trajtojnë si shtetas me dinjitet, edhe atëherë kur dyshohen për një vepër penale.
Në rastin e Komisariatit të Kamzës policia shoqëroi një person që ishte kuruar në spitalin psikiatrik gjashtë herë dhe kuruar për probleme të theksuara. Nuk ishin në gjedje të kuptonin se i vendosën prangat një të riu që vuante nga çrregullime të shëndetit mendor. Ai u vëtëdogj, duke i lënë shkrepësen si “armë”, por mend nuk zenë për të ardhmen. Një tjetër i ri sot ishte i shoqëruar, ndërsa nesër do përfundojë në arkivol, bashkë me brengën e madhe të familjes, sepse u vdiq në duart e “shtetit”.
Edhe rasti i Kavajës lë shumë dyshime për punën e policisë. Për statistikë, kryepolici Nano mund të urdhërojë që të ndalohen përgjegjësit, por problemi i vërtetë i Policisë së Shtetit sot është militantizmi politik i theksuar, lidhjet me pushtetin dhe akoma më rëndë dhuna ndaj më të pambrojturve dhe përkulja duke u “hequr kapelen” të fortëve që ende bëjnë ligjin.
Problemet duhen parë pa syze të errëta, edhe nëse ato i kanë dhuruar biznesmenë për të “hijeshuar” pamjen e jashtme efektivëve që edhe uniformën që mbajnë e kanë të njollosur me tenderin e korrupsionit.
