Ish-kryeministri Sali Berisha e quajti qesharak procesin e zgjedhjes së Presidentit të ri, që nga mazhoranca trumbetohet si një proces transparent e serioz.
Në një deklaratë për mediat këtë të Premte, Berisha tha se “në procesin qesharak të zgjedhjes së presidentit, ato arrijnë gjer aty sa nëpërmjet Baton Haxhisë, Baton Stanishiqit, Edi Rama të propozojë për presidente bashkëshorten e tij”.
“A mund ta imagjinojë kush?! A ka në Shqipëri një zëdhënës më autentik për Ramën se Baton Stanishiqi? Ai këtë njoftoi nëpërmjet tij. Arriti ta personalizojë në këtë shkallëz një proces të rëndësishëm kushtetues, ta kthejë në një procesin e një kuzhine familjare”, tha Berisha.
Në një emision televiziv, Baton Haxhiu, i cili njihet si njeri i afërt me kryeministrin Edi Rama, tha se e sheh bashkëshorten e tij si model për Presidente.
Haxhiu tha se Linda Rama “ka logjikën politike, ka informacion të jashtëzakonshëm politik dhe ekonomik”.
