Avokati Genc Gjokutaj komentoi këtë mbrëmje në Syri Tv ngjarjen në Kavajë ku i riu Ilvi Meta 31 vjeç vari veten brenda dhomës së paraburgimit.
Sipas Gjokutajt, mosnjoftimi i familjarëve, është një akt i dyshimtë nga policia e Kavajës.
“Akti i vetëvrasjes i cili është një nga aktet më të rënda që njeriu mund të kryejë, është rasti kur autori është edhe vetë viktima.
Ambientet e burgjeve duhet të jenë të sigurta. S’jam dakord me njoftimin e policisë, nxitimi për ta bërë atë fajtor, kur ska asnjë vendim gjykate, fyerje e viktimës.”-tha Gjokutaj.
Më tej ai deklaroi se në momentin e këqyrjes së kufomës, nuk janë marrë familjarët. Sipas Gjokutajt shteti duhet të detyrojë familjarët të shikojnë viktimën për të shuar dyshimet.
“Duhet ndryshuar ligji, kur bëhet këqyrja e kufomës, një shtetas që vdes në kushtet e izolimit, familjarët mund të kenë keqkuptime.
I lind detyra shtetit, ka barrën e provës, ky shtet, duhet të ftojë familjarët, një ekspert të tyrin privat nëse duan njohuri të posaçme.
Ata jo vetëm që kanë dhimbje për humbjen e njeriut të tyre, por në dyshim për faktin se pse njeriu i tyre u largua nga jeta.
Nuk duhet lënë në detyrën e organeve proceduese, por duhet bërë me dispozitë detyruese.
Sa e përgjegjshme është policia jonë, e kemi parë në protesta ku nuk e kursejnë dhunën para kameras, imagjinoni pas kamerave.”-tha Gjokutaj.
