Partia Demokratike do të mbledhë ditën e nesërme në orën 18:00 Këshillin Kombëtar. Kjo do të jetë mbledhja e parë pas Kuvendit të 30 Prillit, që zgjodhi edhe anëtarët e rinj të këtij organi.
Deputeti Edi Paloka tha se qëllimi i mbledhjes nuk është vetëm konstituimi, por edhe do të përcaktohet qëndrimi politik i Partisë Demokratike për procesin e zgjedhjes së Presidentit të Republikës.
Paloka po ashtu bëri me dije se do zgjidhet edhe kryetari i Këshillit Kombëtar.
“Komisioni i Përkohshëm i Rithemelimit, ushtrues i kompetencave të Kryesisë së PDSH dhe Kryetarit ka vendosur thirrjen e mbledhjes së parë të Këshillit Kombëtar në datën 6 Maj ora 18.00 në Selinë e PDSH. Qëllimi i mbledhjes, përveç konstituimit të Këshillit Kombëtar është përcaktimi i një qëndrimi politik të PDSH lidhur me procesin e zgjedhjes së Presidentit të Republikës. Bazuar në nenin 44 pika 5 të Statutit, mbledhja duhej mbajtur të paktën 5 ditë nga thirrja, por për shkak të natyrës urgjente të çështjes që trajtohet, gjithsesi Komisioni i Përkohshëm i Rithemelimit vendosi që mbledhja të mbahet nesër pasdite. Këshilli Kombëtar i PDSH është i vetmi organ i cili mund të përcaktojë qëndrimin e unifikuar të PDSH lidhur me një çështje të rëndësishme politike, si ajo e zgjedhjes së Presidentit të Republikës, pasi në bazë të statutit ai është organi më i lartë që drejton veprimtarinë politike të PDSH në periudhën midis dy Kuvendeve. Bazuar në nenin 44 pika 4 e Statutit, në mbledhjen e parë të konstituimit të Këshillit Kombëtar, zgjidhet edhe kryetari i Këshillit Kombëtar midis të paktën 2 kandidaturave alternative”, tha Paloka në një deklaratë nga selia blu.
Vendimi i Komisionit të Rithemelimit për të mbledhur Këshillin Kombëtar, vjen pas thirrjes së mbledhjes së grupit parlamentar nga Enkelejd Alibeaj, të cilin e cilësojnë të shkarkuar si kryetar grupi.
Më herët, Komisioni i Rithemelimit deklaroi se Alibeaj është shkarkuar në Kuvendin Kombëtar të PD-së së 30 Prillit dhe nuk ka tagër për thirrur grupin parlamentar.
Këshilli Kombëtar, sipas vendimit të Kuvendit të PD-së, do të zgjedhë edhe kryetarin e ri të grupit parlamentar demokrat. Megjithatë, referuar deklaratës së Palokës, kjo nuk është në axhendën e nesërme.
