Ekspertët e Marilyn Monroe nuk ishin aspak të lumtur kur Kim Kardashian ngjiti shkallët të hënën në Met Gala e veshur me fustanin më ikonik të legjendës së Hollivudit.
Kim huazoi nga Orlando’s Ripley’s Believe It or Not fustanin ngjyrë bezhë me xixa që Monroe veshi në vitin 1962 për t’i kënduar “Happy Birthday” Presidentit John F. Kennedy. Muzeu më parë ka paguar 5 milionë dollarë në ankand për ta marrë fustanin e famshëm.
Kardashian e detyroi veten të humbte shumë peshë për të hyrë në atë fustan.
“Jam jashtëzakonisht e zhgënjyer që shoh këtë fustan ikonik 60-vjeçar duke u veshur në publik”, -tha për The Post, Michelle Morgan, autore e librit të vitit 2018 “The Girl: Marilyn Monroe, The Seven Year Itch, and the Birth of an Unlikely Feminist”.
“Fustani është jashtëzakonisht delikat dhe më parë është mbajtur në kushte të kontrolluara nga temperatura, por tani ja ku është, jo vetëm duke u veshur, por edhe në një ambient tapeti të kuq, ku çdo gjë mund t’i kishte ndodhur,” vazhdoi ajo.
Morgan vuri në dukje se djersa, parfumi dhe grimi mund të kenë hyrë në veshje dhe të kenë shkaktuar dëmtime dhe njolla. Megjithatë, Kardashian thuhet se shkoi pa grim trupi në këtë ngjarje. Për më tepër, një përfaqësues nga Ripley’s tha për The Post se ajo tregoi “respektin më të madh” për veshjen.
“Ky nuk ishte vendim i lehtë për Ripley, megjithatë, Kim Kardashian ka vazhduar të tregojë respektin maksimal për këtë mundësi dhe veshje historike”, tha zëdhënësi në një deklaratë. “Nga hulumtimi i gjerë deri tek ndjekja e udhëzimeve të tilla si mos grimimi i trupit, veshja e fustanit vetëm për paraqitjen e shkurtër në tapetin e kuq dhe duke mos bërë absolutisht asnjë ndryshim, ajo është kujdesur në maksimum.”
Ripley i tha gjithashtu The Post se asnjë dëmtim nuk i kishte ndodhur fustanit.
Nina Boski, producentja e dokumentarëve dhe podkastit televiziv “Marilyn: Behind the Icon”, mbështeti qëndrimin e Morgan, duke thënë për The Post se momenti viral i Kardashian “nuk është një kujtim pozitiv i yllit”.
“Unë mund ta kuptoj pse Kim do të donte ta vishte fustanin për qëllime publiciteti; megjithatë, fustani duhet të ishte veshur vetëm nga një person, dhe ajo është ikona Marilyn Monroe”, tha Boski. “Kjo nuk e ndihmon trashëgiminë e Marilyn-it, veçanërisht në 60-vjetorin e vdekjes së saj.”
Scott Fortner është një historian dhe koleksionist i Marilyn Monroe dhe gjithashtu dha mendimin e tij për veshjen e Kim në Met Gala.
“Kim e theu internetin [me pamjen e saj] dhe ishte një mundësi për të dhe për Ripley”, tha Fortner për The Post. “[Por] fansat janë të indinjuar sepse është një nga ato gjëra në komunitetin e Marilyn që konsiderohet e shenjtë. Fustani është elementi kryesor i Marilyn Monroe dhe është veshur një herë nga ajo.”
Fortner deklaroi me vendosmëri se veshja e fustanit, që ai e quajti “një thesar kombëtar”, duhet të kishte mbetur diçka e bërë dikur nga vetë Monroe.
“Askush nuk duhet ta kishte riveshur këtë fustan”, tha Fortner. “Është e vështirë sepse [Kardashian] është një nga njerëzit më me ndikim në botë. Nëse do të ishte në dorën time, nuk do ta kisha lejuar thjesht për shkak të rëndësisë së pjesës në historinë kulturore amerikane. Por më lejoni të jem i qartë, kjo nuk ka të bëjë fare me Kim Kardashian”, shtoi ai.
Në deklaratën për The Post, organizata e Ripley vlerësoi gjithashtu masat paraprake që u morën për të mbrojtur veshjen.
“Ripley’s e Believe It Or Not! është një kompani atraksionesh në pronësi private me qëllim që të frymëzojë dhe argëtojë mysafirë të të gjitha moshave në mënyra jokonvencionale. Ne krenohemi shumë që kemi fustanin “Happy Birthday” dhe jemi konsultuar me ekspertë dhe konservatorë të shumtë të tekstilit për këtë përpjekje,” shtoi Ripley. “Ndërsa asnjë nuk ishte me vendosmëri pro ose kundër veshjes së Kim-it, kontributi i tyre na ndihmoi të krijonim një sërë masash paraprake dhe procedurash për Met Gala. Ky kujdes pati rezultat, pasi nuk pati dëme në ngjarjen e mbrëmshme.”
Zëdhënësi vuri në dukje se fustani do të kthehet të mërkurën, më 4 maj, në “Ripley’s Vault, një dhomë e errët, e kontrolluar me temperaturë (68 gradë) dhe lagështirë (40 – 50%), ku mbetet në kutinë e tij, e montuar dhe e mbuluar me veshje pambuku pa acid. Forma ndihmon në parandalimin e palosjeve dhe stresit në fustan, ndërsa veshja e mbron atë nga drita, lagështia dhe ndotësit e mjedisit.”
