Përveç grave, ushtarët rusë dyshohet se përdhunuan edhe burra dhe djem ukrainas. Deklarata vjen nga zyrtarët e OKB-së dhe Kievit.
Mes një hetimi në vazhdim për dhjetëra raste të denoncuara, duke folur të martën, përfaqësuesja speciale e OKB-së për dhunën seksuale në luftë, Pramila Patten paralajmëroi se rastet tashmë nën hetim ishin vetëm ‘maja e ajsbergut’.
“Kam marrë raporte, ende të pa verifikuara… për rastet e dhunës seksuale ndaj burrave dhe djemve në Ukrainë,” tha ajo gjatë një konference për shtyp në Kiev.
Ajo u bëri thirrje të gjithë “viktimave” të përdhunimit që të paraqiten dhe të raportojnë çdo krim të tillë nga ushtarët rusë, ndërsa pranoi se sa sfiduese është ta bësh këtë mes frikës së hakmarrjes ose të kthimit të forcave të Moskës.
Ajo tha gjithashtu se bota ka lejuar që dhuna seksuale të përdoret si një armë ‘e lirë’ e luftës për një kohë të gjatë.
‘E lirë, sepse është pa kosto. Shumë efektive, sepse nuk prek vetëm viktimën, por prek familje të tëra, komunitete. Është luftë biologjike. Është luftë psikologjike”, tha ajo.
Përdhunime të kryera nga ushtarët rusë janë raportuar gjerësisht në qytetet që u pushtuan nga forcat e Putinit në ditët e para të pushtimit dhe që atëherë janë çliruar pasi ushtritë e Moskës u tërhoqën dhe i ripërqëndruan përpjekjet e tyre në lindje.
Kur forcat ukrainase, gazetarët dhe civilët hynë përsëri në Irpin dhe Bucha, ata zbuluan qindra trupa civilësh që ishin përdhunuar, torturuar dhe ekzekutuar – disa me duar të lidhura pas shpine.
Rusia ka mohuar më parë se ka shënjestruar civilët dhe ka hedhur poshtë pretendimet se forcat e saj kanë kryer krime lufte në Ukrainë, pavarësisht provave në rritje.
