Dedë Pllanaj, që mbeti i plagosur mbrëmë pranë një pike të karburantit në Shkodër, është transportuar për në Spitalin e Traumës në Tiranë.
Ai është nisur drejt kryeqytetit, që të mund të marrë mjekim më të specializuar.
Mësohet se ndaj 60-vjecarit është qëlluar tetë herë. Nga këto, 6 plumba e kanë kapur në pjesë të ndryshme të trupit.
Pllanaj punonte si roje karburanti në hyrje të rrugës Shkodër-Koplik, pas rotondos së Dobraçit.
Dedë Pllanaj është kushëriri i Bardhok Pllanajt, që u vra disa kohë më parë në atentat në Shkodër.
Njoftimi i policisë për ngjarjen e ndodhur mbrëmë:
‘Rreth orës 22:10, në lagjen “Dobraç” Shkodër, në rrethana ende të paqarta, është plagosur me armë zjarri shtetasi D.P. 60 vjeç banues në fshatin Shtoj i Vjetër, i cili ndodhet në Spitalin Rajonal Shkodër nën kujdesin e mjekëve. Shërbimet e Policisë kanë ngritur pika kontrolli në hyrje – dalje të qytetit dhe vijon krehja e zonës me qëllim kapjen e autorit/ve. Grupi hetimor nën drejtimin e Prokurorisë së Rrethit Gjyqësor Shkodër, po punon për identifikimin e autorit/ve zbardhjen dhe sqarimin e plotë të kësaj ngjarjeje.’
