Belind Këlliçi ishte i dyti që e mori fjalën në nisje të punimeve të Kuvendit Kombëtar të Partisë Demokratike.
Ai u bëri thirrje demokratëve të bashkohen me Rithemelimin, duke theksuar se kjo është opozita e re.
“Gjendja do të ndryshojë. Rruga drejt ndryshimit nuk kalon nga qeveria, por nga opozita e re. I vetmi ndryshim është ai përmes ndryshimit tonë. Ne nuk do të jemi kurrë një opozitë fasadë. Kjo do ta ndryshojë Shqipërinë. Momenti nuk është i largët, por sot këtu, në këtë kuvend. Pas shumë debateve, edhe të pahijshme dhe të palavdishme, jemi këtu sot me dorën e shtrirë. Kjo është opozita e re. Edi Rama dhe Lulzim Basha shkallmuan votën e lirë”, tha ai.
Deputeti demokrat u shpreh se Edi Rama nuk do të kishte pasur as edhe një shans për të fituar nëse përballë do të kishte pasur një opozitë të vërtetë.
“Me një opozitë të vërtetë që nuk luhatet sipas interesave, Edi Rama nuk do kishte pasur as edhe një shans. Gjendja e padurueshme në Shqipëri do të ndryshojë. Rruga e ndryshimit nuk kalon nga qeveria. I vetmi ndryshim që kemi në dorë të bëjmë dhe do të bëjmë është ai që vjen përmes ndryshimit tonë. Nuk do të jemi opozitë fasadë. Kjo rrugë do ta ndryshojë edhe Shqipërinë”, tha Këlliçi.
Ai u shpreh në fund se Kuvendi do të jetë një fillim i ri ku në fund vota do të vendosë për gjithçka.
“Duhet të vendosim sot votën e lirë si modelin e vetëm për të ndërtuar strukturat e partisë në të ardhmen. Ky Kuvend sot do të jetë një fillim i ri, një kapitull i lirë, ku secili do thotë atë që beson, dhe në fund vota do të vendosë për gjithçka”, u shpreh ndër të tjera Këlliçi.
