Java e fundit në Kategorinë e Dytë vulosi sot ekipin që fiton të drejtën e ngjitjes në Kategorinë e Parë nga Grupi A, por gjithashtu u përcaktuan skuadrat që do të zbresin në të Tretën, si dhe ato që luftojnë për fazën “play off” dhe “play out”.
Flamurtari dhe Luzi 2008 ngjiten direkt në të Parën si kryesues përkatësisht i Grupit B dhe A, ndërsa Internacionali, Këlcyra dhe Përmeti janë rrëzuar automatikisht në të Tretën.
Arritje historike për Luzin që për herë të parë do të militojë në Kategorinë e Parë. Kavajasit ia dolën falë golavarazhit më të mirë. Dy ndeshjet mes Luzit dhe Orikut përfunduan me fitoren 1-0 të secilës skuadër, teksa në lojë hyri golavarazhi.
Për sa i përket skuadrës tjetër që do të bjerë nga kategoria në Grupin A, ajo do të përcaktohet nga çifti i nesër ADA-Klosi, një duel direkt ky. Fituesja e këtij çiftit do të ndeshet me Gramozin në “Play-Out”, ndërsa ajo që humbet bie direkt në të Tretën.
Ndërkohë Luftëtari me fitoren ndaj Tepelenë evitoi turpin duke qëndruar në Kategorinë e Dytë.
Për sa i përket “Play-Off”-it, në Grupin A, do të vazhdojnë ëndrrën, Oriku, Veleçiku, Gramshi dhe Muralani, ndërkohë që në Grupin B, janë Labëria, Devolli, Sopoti dhe Albpetroli ato që do të shpresojnë te një “biletë” në Kategorinë e Parë nëpërmjet ndeshjeve shtesë.
