Deputeti demokrat Agron Shehaj tha nga podiumi ku po mbahen fjalimet në Kuvendin e PD-së se opozita duhet të jetë e vërtetë për të fituar besimin e qytetarëve.
Ai tha se Shqipëria ndodhet në një krizë sepse është e korruptuar, ndërsa shtoi se qeveria nuk ka zgjedhur interesin publik por mbarëvajtjen e punëve me oligarkët.
Më tej, ai tha se njerëzit do të vijnë të kontribuojnë për PD, kur të binden se po luftojmë për interesin e tyre.
“PD ka në supe shumë probleme. Humbëm zgjedhjet, patëm probleme ekstreme pas shokut tronditës së 25 prillit. Si mund të fitojmë besimin e shqiptarëve, besimin e atyre që janë të revoltuar nga arrogance e kësaj qeverisjeje, pro janë spektik për ne. Ka vetëm një shteg, duhet të jemi të vërtetë. Kjo është sprova dhe sakrifica që duhet te bëjmë. Të bëjmë një opozitë të vërtetë. Të zgjedhim të mbrojmë interesin e qytetarëve. Të jemi të vërtetë dhe të bëjmë një zgjedhje të vështirë, të zgjedhim interesin e shumicës dhe t’i qëndrojmë deri në fund. Skandalet duhen denoncuar me forcë, nuk duhet të ecim apo të mbyllim njërin sy”, tha Shehaj.
“Qeveria nuk ka zgjedhur interesin e qytetarëve. Nuk jemi të gjithë njësoj, dhe as nuk do të sillemi njësoj kur të vijmë në pushtet. Do të luftojmë kapjen e shtetit, nuk mund të ketë më oligarkë, kjo është ë vetmja rrugë për të shëruar plagën e rëndë të mos besimit. Shqiptarët duan një opozitë të vërtetë. Njerëzve ju dhëmb hajdutëria e qeverisë. Duhet të tregojmë që jemi të vërtetë. Vetëm kështu do fitojmë”, u shpreh ai më tej.
