Biznesmeni italian Francesco Becchetti dhe të pandehurit e tjerë të dënuar nga Gjykata e Tiranës më 21 Mars, kanë ankimuar vendimin e shkallës së parë.
Dënimi në shkallë të parë
Gjykata e Tiranës ka dënuar me 17 vite burg Francesco Becchetti-n, për pastrim parash dhe vjedhje duke shpërdoruar detyrën. Prokuroria kishte kërkuar 20 vite burg për biznesmenin italian. Sipas Gjykatës, Becchetti ka krijuar një sistem shoqërish tregtare, me qëllim fshehjen e veprimtarisë kriminale. Në këtë sistem, sipas hetimeve, është përfshirë i pandehuri Becchetti, duke futur në këtë marrëdhënie nënën Lilliana Condomiti dhe vjehrrën e tij Vjollca Kamberi. Sipas Gjykatës, asetet e tyre dhe llogaritë bankare të shoqërive do kalojnë në favor të shtetit. Përveç Bechettit, Gjykata dënoi edhe mamanë dhe persona të tjerë si bashkëpunëtorët e tij: Liliana Condomitti- 8 vite burg; Mauro De Renzis – 16 vite burg; Erjona Troplini-8 vite burg; Stavri Peçi – 2 vite burg, pezullim në shërbim prove; Fetah Dervishi – 3 vite burg, pezullim dënimi në shërbim prove.
Ankimi
Këtë të Enjte, Apeli i Tiranës bëri me dije përmes një njoftimi për mediat se kundër vendimit të shkallës së parë “kanë paraqitur ankim të pandehurit: Francesco Becchetti, Personi juridik “Energji” shpk, Personi juridik “Agonset” shpk, Liljana Condomiti, Personi juridik “400 KV” shpk”.
Shorti elektronik për caktimin e relatorit të çështjes është caktuar të hidhet ditën e nesërme, në ora 14:30.
Fitorja në Strasburg
Nga ana tjetër, Becchetti paditi shtetin shqiptar në Strasburg dhe fitoi çështjen lidhur me mbylljen e televizionit ‘Agon’ në vitin 2015 nga autoritetet shqiptare.
Sipas vendimit, shteti shqiptar duhet ti paguaj sipërmarrësit italian mbi 100 milion euro, ndërkohë kanë nisur kanë nisur procedurat për njohjen dhe ekzekutimin e detyrimit.
