Kryeministri Rama dhe ministrja Balluku zhvilluan një takim me një grup kompanish që operojnë në tregun e energjisë në SHBA dhe BE. E pranishme ishte dhe ambasadorja e SHBA në Shqipëri, Yuri Kim, e cila është shprehur se rajoni duhet të kërkojë të gjejë një zgjidhje së bashku për një rrugë të re përpara për sigurinë energjitike dhe atë klimatike.
“Rajoni duhet të kërkojë të gjejë zgjidhje së bashku për të gjetur një rrugë të re përpara për sigurinë energjitike dhe atë klimatike. Unë kam folur shumë herë në të shkuarën për sigurimin. Kjo është arsyeja pse u ndërtua gazsjellësi transatlantik, kjo është arsyeja pse SHBA janë të lidhur me Shqipërinë. Po shohim një projekt të zhvilluar për të sjellë. Jam e emocionuar që shoh kaq shumë drejtues për të gjetur zgjidhje”, tha ajo.
Kim u shpreh po ashtu se siguria energjitike është e lidhur ngushtë me sigurinë kombëtare.
Nga ana tjetër, kryeministri Edi Rama foli për “progres në punën për transformimin e impiantit të Vlorës në një impiant prodhimi energjie”.
“Po ashtu dëshmoj shumë gjëra që po ndodhin me energjinë diellore në Shqipëri, po kryhet punë për energjinë e erës dhe goxha punë masive është në vijim për ëndrrën e gjatë të hidrocentralit të Skavicës, i cili do rrisë me 20% prodhimin e energjisë. Do na japë një shtytje përpara drejt pavarësisë energjitike. Nuk ka më dyshim, që edhe pse kompanitë e përfaqësuara këtu në këtë sallë vlejnë miliarda, jam i sigurt që të gjithë zotërinjtë e pranishëm në këtë sallë janë këtu për shkak të arsyeve të biznesit dhe se kompanitë e këtyre janë këtu për të investuar e për të na u bashkuar neve që të bëjmë jo vetëm Shqipërinë, por mbarë rajonin, ta çojmë përpara”, shtoi ai.
