Vrasja e bosit të mafies greke Giannis Skaftorou një ditë më parë ka bërë që autoritetet të vihen në lëvizje që të mund të kapin autorët.
Skaftorou po festonte Pashkët me familjen e tij në shtëpinë e prindërve, në momentin kur katër persona hipur mbi motocikleta kanë zbrazur kallashnikovët në drejtim të 55-vjecarit.
Mediat greke shkruajnë se viktima i ruhej ndonjë ngjarje të tillë, ndërsa edhe familjarët ishin të vetëdijshëm për rrezikun, sepse kishin dijeni për jetën që bënte.
“Kemi pasur fatkeqësinë që fëmijët tanë që në moshën 35-vjeçare të përfshiheshin në ngjarje të tilla. Ne i vizitonim nëpër burgje për t’u dërguar ushqime. Si unë ashtu edhe gruaja ime nuk morëm asnjë qindarkë nga djali ynë, mes parave që vinin nga krimi.
Tani në pleqëri dhe me shëndetin e rënduar kullosim dele dhe dhi nëpër male e kujdesemi për nipërit dhe djemtë tanë”, ka thënë babai i tij.
Giannis Skaftouros ishte pjesëtar i grupit që është akuzuar për rrëmbimin e Periklis Panagopulos, ngjarje për të cilën ka dyshime se ka marrë një shpërblim prej 30 mijë eurosh. Këto para nuk janë gjetur kurrë.
Skaftouros ka dyshime se ka qenë nën vëzhgim prej katër vitesh me radhë nga ana e një grupi kriminal. Në këtë kohë, ai ishte në burgun e Koridhalos, ku edhe është sulmuar nga një shqiptar.
Hetimet
Hetuesit grekë kanë marrë kamerat e sigurisë të ditës kur ka ndodhur edhe ngjarja e rëndë. Nuk ka dyshime se autorët e kishin ndjekur prej kohësh viktimën dhe e kanë goditur atë në një ditë, kur ishte Pashkë dhe truprojat e tij ishin pushim.
Autoritetet kanë deklaruar se edhe dita, edhe vendi i ngjarjes nuk kanë qenë të rastësishme. Kjo sepse, në këtë fshat, autorët mund të dilnin më kollaj pa u zbuluar.
Ka dyshime se porosia e vrasjes mund të jetë dhënë nga burgu nga ndonjë grup kundërshtar, që synon ta dominojë këtë zonë. Dyshimet e tjera janë edhe për të larë hesapet brenda bandës e ndoshta edhe për t’ja marrë drejtimin e bandës kriminale.
