Një prej favoriteve për të triumfuar në Champions, përballë skuadrës që e ka fituar më së shumti trofeun. Manchester City sfidon Realin e Madridit në gjysmëfinalen e parë, me disavantazhin e historisë.
“Los Blancos” janë 13 herë kampionë të Europës, një rekord në arenën ndërkombëtare, ndërsa anglezët kërkojnë suksesin e parë, pas finales së humbur me Chelsea në edicionin e kaluar. Gjithsesi, ekipi i Guardiolës motivohet nga fakti që dy vjet më parë i eliminoi madrilenët në fazën e 1/8.
“Nëse do të na duhej të konkurronim me historinë e tyre, nuk do të kishim asnjë shans. Po presim me padurim të luajmë në fushë, sfida me Real Madrid është një provë e jashtëzakonshmedhe synojmë ta fitojmë. Është një nder të jesh në gjysmëfinalet e Champions, përballë një prej ekipeve që ashtu si Barcelona, Bayern e Liverpool kanë shkruar historinë e këtij turneu”, tha trajneri i City, Pep Guardiola.
Ndërkohë, sulmuesi Raheem Sterling, u shpreh: “Në dy ndeshjet e fundit, Reali është kualifikuar pas situatave të vështira, duke shënuar gola në fund. Megjithatë, ne kemi lojtarë që dinë si t’i përballojnë ndeshjet me presion të lartë. Do të jemi në nivelin e pritur”.
Gjatë këtij edicioni, Reali nuk është vlerësuar si favorit. Përkundrazi, me paraqitjet e tyre epike, madrilenët eliminuan dy ekipe pretendente si Paris Saint Germain dhe Chelsea. Carlo Ancelotti, trajneri i madrilenëve, theksoi: “Shumë njerëz nuk na shihnin si pretendentë. Gjithmonë thoja se Reali do të luftojë për ta fituar këtë trofe. Në Madrid, gjysmëfinalet e Champions nuk shihen si sukses. Ne duam të luajmë në finale. Ky është objektivi ynë, sepse nëse kualifikohemi do të kemi shanse të mira për të triumfuar. Në gjysmëfinale janë dy skuadra si Reali dhe Villarreal, për të cilat më parë askush nuk do të hidhte bast”.
Në sfidën tjetër gjysmëfinale, Villarreal do të përballet të mërkurën me Liverpool, në Anfield.
