Ka përfunduar gjykimi për detarët të cilët akuzohen për shpërdorim detyre dhe kalim të paligjshëm të kufirit për 55 klandestinë nga Lindja e Mesme, të ndaluar teksa mjeti lundrues me të cilin po i drejtoheshin Italisë, pësoi avari.
Gjyqtarja e Vlorës Arbana Selmanaj ka rrëzuar akuzat e prokurorisë, përfaqësuar nga Erjon Shqarri, duke i dhënë pafajësinë Besmir Meçajt, Bledar Bufajt, Sejfulla Bejës, Roland Canajt dhe Ardit Alikajt. Pafajësinë e mori edhe Fatos Dusha, pronari i hotelit në Tiranë ku dyshohej se strehoheshin klandestinët.
Sakaq, gjykata vendosi dënimin me 9 vite burgim për skafistin Emiljano Likaj dhe 6 vite burg për Qazim Ismailin, i cili strehonte emigrantët.
Emiljano Likaj dhe Qazim Ismaili pritet të dalin edhe përpara Gjykatës së Posaçme, pasi akuzohen si pjesë e rrjetit të trafikut ndërkombëtar të klandestinëve. Akuza iu komunikua në finalizimin e operacionit ndërkombëtar “Astrolabio”, ku u arrestuan 55 persona në 3 shtete.
