Ministrja e Shtetit për Marrëdhëniet me Parlamentin, Elisa Spiropali, u pyet sot në emisionin “Të Paekspozuarit”, lidhur me atë se “kush ju ka udhëzuar juve që të njihni grupin e Lulzim Bashës, si opozitën e vendit”.
Spiropali tha se nuk jemi ne që caktojmë opozitën, ata e kanë çështjen në Gjykatë.
“Enkelejd Alibeaj është kryetari i Grupit Parlamentar të PD dhe e kanë zgjedhur ata. Sa kohë ai është kryetar i Grupit Parlamentar dhe ne do të diskutojmë me atë”, tha Spiropali.
E pyetur se çfarë do të bënte PS nëse kryetar i Grupit Parlamentar do të ishte Sali Berisha, ministrja e Ramës tha se ai ka një problem me SHBA.
Por Ylli rakipi, drejtues i emisionit, duke ironizuar Spiropalin tha “ju jeni ministre dhe përfaqësuese e PS, apo përfaqësuese e SHBA”.
“Sulmet ndaj Yuri Kim janë të padrejta”, tha Spiropali, e cila humbi qetësinë, në momentin kur u pyet “po ç’punë keni ju me PD, nëse ata zgjedhin Berishën, i cili mund të mos ketë kontakte me SHBA”.
“Kush ka më shumë rëndësi sovraniteti i PD apo raporti i vendit me aleatin tonë kryesor SHBA? Si mundem unë të ve në dyshim vendimet e një shteti sovran siç janë SHBA”, tha Spiropali.
