Mes kampionatit dhe Europa League, Barcelona pësoi humbjen e tretë radhazi në “Camp Nou” teksa mbrëmjen e së dielën u mposht nga Rayo Vallecano me rezultatin minimal, 0-1.
Por, përveç tre pikëve, trajneri Xavi Hernandez në këtë ndeshje humbi edhe shërbimet e Sergino Dest.
Mbrojtësi anësor pësoi një dëmtim muskulor në tendinë ndërsa analizat tregojnë se amerikani tashmë duhet të qëndrojë jashtë fushave për të paktën katër javë, megjithatë koha optimale e rikthimit në fushë shkon deri në gjashtë javë.
Në këtë formë, Dest mund ta konsiderojë të mbyllur këtë sezon edhe pse jo në mënyrën që do ta kishte preferuar pasi në pesë ndeshjet e mbetura është i detyruar ta ndjekë skuadrën nga shtëpia.
Në këtë sezon, 21-vjeçari është aktivizuar në 21 ndeshje me blaugranët dhe ka në llogarinë e tij tre asiste, mirëpo nuk ia ka dalë ta gjejë në asnjë sfidë rrugën e rrjetës.
