Kukësi ka më në fund një stadium të denjë dhe sipas standardeve bashkëkohore.
Inaugurimi i “Kukës Arena” do të bëhet sot në orën 20:00 me ndeshjen Kukësi-Laçi e vlefshme për Kategorinë Superiore, nën prozhektorët e dritave.
Pak orë para inaugurimit, janë publikuar edhe pamjet e fundit nga impianti modern ku tashmë duket gjithçka gati.
Impianti, që ka një kapacitet prej 6200 vendesh, siç e kërkojnë procedurat i është nënshtruar dhe testeve të fundit për fushën dhe ndriçimin, që kanë rezultuar pozitive.
Tashmë Kukësi do të kthehet të luajë në fushën e vet duke nisur nga mbrëmja e sotme, pas dy sezoneve.
Ndërsa futbollit shqiptar i shtohet një tjetër stadium modern, që plotëson të gjitha kriteret e UEFA-s dhe është në gjendje të presë ndeshje të kompeticioneve ndërkombëtare, në nivel klubesh dhe kombëtaresh.
