Një tërmet me magnitudë 5.7 të shkallë Rihter, epiqendra e të cilit ishte në Bosnje Hercegovinë, ka tronditur disa vende të Ballkanit, përfshi Kosovën dhe Shqipërinë.
Media të ndryshme në rajon raportojnë lidhur me tërmetin.
Në Mostar raportohen lëkundje shumë të forta, që zgjatën rreth 15 sekonda.
Lëkundjet filluan ngadalë me gjëmime dhe lëkundje të lehta, dhe në fund lëkundjet u bënë shumë të forta. Disa zona në Mostar janë pa energji elektrike dhe popullsia është në këmbë.
“Tërmeti më i madh që kam ndjerë në 40 vitet e mia!”, i tha një dëshmitar okular “The Dubrovnik Times”.
Raportohet se tërmeti është ndjerë edhe në Brindisi në Italinë jugore.
Lëkundjet e forta zgjatën vetëm për rreth 5 deri në 7 sekonda, por kjo ishte e mjaftueshme për të tronditur ndërtesat.
Epiqendra e tërmetit ishte 45 kilometra në juglindje të Mostarit në Bosnje dhe Hercegovinë dhe 16 kilometra në lindje të qytetit Stolac në Bosnje dhe Hercegovinë, i cili është rreth 90 kilometra nga Dubrovniku. Sipas raportimeve tërmeti u ndje në shumë pjesë të Kroacisë jugore, si dhe në Shqipëri, Mal të Zi, Serbi dhe madje edhe në Itali.
Dëme nga tërmeti i fuqishëm janë raportuar në Mostar me disa fasada raportohet se janë dëmtuar.