Nga Boldnews.al
Shqyrtimi i rastit të gjyqtares Marinela Osmani në Kolegjin e Posaçëm të Apelimit risjell në vëmendje pikëpyetjet për standartet e ndjekura nga strukturat e Vetingut dhe ndërhyrjet politike, në këtë rast favorizuese, në procesin e rivlerësimit kalimtar të zyrtarëve të drejtësisë.
Gjyqtarja Osmani, e cila aktualisht është këshilltare ligjore në Këshillin e Lartë Gjyqësor, u konfirmua në detyrë nga Komisioni i Pavarur i Kualifikimit në Shkurt të vitit 2021.
Operacioni Ndërkombëtar i Monitorimit (ONM) dhe Komisioneri Publik nuk ishin dakord me këtë vendim dhe e përcollën çështjen në shkallën e dytë të Vetingut, ku kërkohet shkarkimi i saj nga detyra.
Për të kuptuar procesin e rivlerësimit të Marinela Osmanit, duhet hedhur vështrimi tek Vetingu i Gentian Osmanit, bashkëshortit të saj, ish-prokuror i shkarkuar nga detyra.
Shërbimi ndaj Geron Xhafaj
Gentian Osmani ishte zv.drejtues i Krimeve të Rënda kur u përfshi në procesin e rivlerësimit kalimtar, në vitin 2018.
Në atë kohë, Osmani po udhëhiqte hetimin ndaj akuzave publike për përfshirjen në trafik narkotikësh të Agron (Geron) Xhafaj, vëllait të ministrit të Brendshëm të asaj kohe, Fatmir Xhafaj.
Prokurori Osmani bëri gjithçka për të favorizuar Geron Xhafajn, duke hetuar dhe akuzuar denoncuesit publik.
Ky shërbim ndaj Fatmir Xhafajt, i cili përkëdhel sedrën duke u konsideruar edhe si “babai i drejtësisë”, ishte një bonus pozitiv për prokurorin Gentian Osmani.
Në 2 Gusht 2018, Osmani u konfirmua në detyrë, pavarësisht pikëpyetjeve të rëndësishme mbi pasurinë e tij.
Në disa analiza të mëhershme, “Boldnews.al” ngriti dyshime se si kishte shtuar të paktën 20 mijë euro në tre muaj apo se si kishte “mbijetuar” me vetëm 8 mijë lekë në muaj.
Megjithatë, Gentian Osmani u lejua të vijonte karrierën e tij dhe, madje, u promovua si anëtar i Këshillit të Lartë të Prokurorisë.
Vendimi i konfirmimit të tij u ankimua dhe Kolegji i Posaçëm i Apelimit, i cili e shkarkoi nga detyra për kriterin e pasurisë.
Sipas KPA-së, Osmani nuk justifikonte me burime të ligjshme 17 milionë lekë të vjetra.
Bashkëshortja e tij, Marinela Osmani, u përfshi në procesin e Vetingut pasi bashkëshorti i saj u shkarkua nga KPA-ja.
Gjyqtarja deklaroi para Komisionit të Pavarur të Kualifikimit se duhej ndjekur parimi i proporcionalitetit, që do të thoshte se nuk mund të shkarkoheshin dy anëtarë të të njëjtës familje, për të njëjtin fakt, megjithëse problemi i pasurisë së Gentian Osmanit përfshinte edhe bashkëshorten e tij, Marinela Osmani.
Komisioni i Pavarur i Kualifikimit, megjithëse konstatoi probleme edhe në pasurinë e gjyqtares Osmani, e pranoi këtë argumentin e “proporcionalitetit”, duke e konfirmuar në detyrë.
Në vendimin e zbardhur të KPK-së për gjyqtaren Osmani lexohet, ndër të tjera: “Aplikimi i së njëjtës masë disiplinore ndaj subjektit të rivlerësimit me atë të bashkëshortit të saj, në vështrim të konstatimeve të renditura më sipër, nuk do të ishte as proporcional dhe as objektiv…”.
Standartet e shumëfishta
Ky qëndrim i Komisionit të Pavarur të Kualifikimit është shumë më i ndryshëm me rastet e ngjashme të trajtuara nga shkalla e parë e Vetingut.
Më herët, KPK ka vendosur shkarkimin nga detyra të bashkëshortëve gjyqtarë e prokurorë, bazuar në të njëjtat problematika pasurie.
Për më tepër, në një rast që është tipik për të shpjeguar mungesën e standarteve të procesit të rivlerësimit, një prokurore u shkarkua nga detyra, pasi bashkëshorti i saj nuk arriti të provonte me dokumenta të ligjshme pagesën e kontributeve shoqërore në një vend të Azisë së Vogël, ku ai kishte punuar para njohjes dhe lidhjes së martesës me subjektin e rivlerësimit.
Ndërkohë, në rastin e gjyqtares Osmani, strukturat e Vetingut e “justifikuan” problematikën në pasurinë e saj të krijuar pas martese, me shkarkimin e bashkëshortit Gentian Osmani.
Megjithatë, tashmë pritet vendimi përfundimtar i Kolegjit të Posaçëm të Apelimit.
Trupa e drejtuar nga Albana Shtylla, me relatorë Natasha Mulaj dhe anëtarë Ina Rama, Sokol Çomo dhe Rezarta Schuetz, pritet të japë fjalën e fundit në 11 Maj, ora 9.00.
