Gjykata e Tiranës ka pranuar ankimimin e bërë nga Enkelejd Alibeaj lidhur me çështjen e njohjes së Kuvendit të PD-së zhvilluar më 11 Dhjetor dhe vendimet e marra aty.
Më 25 mars, gjyqtari i Tiranës Agron Zhukri njohu Kuvendin e zhvilluar në “Air Albania” që vendosi shkarkimin e Bashës si kryetar i PD dhe marrjen e drejtimit të partisë nga “Komisioni i Rithemelimit”.
Vendimi u ankimua nga Alibeaj.
Sot, gjyqtarja e Tiranës Blerina Muça vendosi pranimin e ankimit.
“Sot më datë 22.04.2022, gjyqtare znj. Blerina Muça, në lidhje me kërkesën e paraqitur nga Partia Demokratike e Shqipërisë përfaqësuar nga z.Enkelejd Alibeaj, me objekt: Prishjen e Vendimit Nr. 1346/222 Akti, Nr. 3 Vendimi, datës 25.03.2022 të Gjykatës së Rrethit Gjyqësor Tiranë me gjyqtar Agron Zhukri duke vendosur pushimin e gjykimit ose kthimin e saj për shqyrtim në të njëjtën gjykatë, por me tjetër trup gjykues, vendosi në dhome këshillimi: Pranimin e ankimit të palës ankuese, Partia Demokratike e Shqipërisë, përfaqësuar nga Nënkryetari i saj z.Enkelejd Alibeaj, ndaj Vendimit Nr. 3, datë 25.03.2022 të Gjykatës së Rrethit Gjyqësor Tirane”, thuhet në një njoftim të gjykatës.
Po ashtu, saktësohet se “kundër këtij vendimi nuk lejohet ankim”.
Pas këtij verdikti, që hap rrugën e ankimit të vendimit të gjyqtarit Zhukri në gjykatën e Apelit, beteja gjyqësore mes palëve duket se do të vijojë.
Përfaqësues ligjorë të Rithemelimit janë shprehur më herët se Enkeleid Alibeajt nuk mund të ankimonte vendimin e shkallës së parë duke qenë se nuk ishte palë në proces, megjithatë gjyqtarja Muça sot vendosi ndryshe.
Ish-kryeministri Sali Berisha ka akuzuar më herët (madje edhe gjatë ditës së sotme) se kryeministri Edi Rama dhe ambasadorja amerikane Yuri Kim kanë tentuar të ndikojë në proces.
