Fanella që legjenda e futbollit argjentinas Diego Armando Maradona mbajti veshur kur shënoi golin e famshëm “Dora e Zotit”, pritet që të shitet për miliona Paund.
Më 20 Prill u hap ankandi online për fanellën, i cili do të mbyllet më 4 Maj dhe menjëherë erdhi një ofertë për ta blerë me vlerë 4 milionë Paund.
London Sothibi, kompania që po merret me organizimin e ankandit, garanton autenticitetin e fanellës, ndërsa hedh poshtë pretendimet e ardhura nga familja e ikonës argjentinase se kjo nuk ishte bluza që Maradona mbajti veshur kur shënoi dy golat e famshëm kundër Anglisë në sfidën çerekfinale të Kupës së Botës në vitin 1986.
Legjenda albiçeleste, që mbante numrin 10 në shpinë, në fillim realizoi golin e famshëm, e katër minuta më pas, shënoi një nga rrjetat më të bukura në historinë e botërorit.
Mesfushori i Anglisë Stivi Hoxh mori fanelën e “El pibe de Oro” pas takimit dhe lajmëroi se do ta nxirrte në ankand, pasi e kishte lënë atë për 19 vite në Muzeun Kombëtar të Futbollit në Angli.
Përfaqësuesi i kompanisë që merret me organizimin e ankandit, Brahm Uaçer, tha se autenticiteti i bluzës ishte vërtetuar.
Maradona konsiderohet si një nga futbollistët më të mëdhenj të të gjitha kohërave dhe adhurohet nga miliona njerëz anembanë botës.
