Në raportimin vjetor për aktivitetin e institucionit që drejton, kryetari i Kontrollit të Lartë të Shtetit, Arben Shehu deklaroi se shqetësim mbetet keqmenaxhimi i fondeve publike nga pushteti.
Teksa raportoi te komisioni parlamentar i Ekonomisë, ai tha se autoritetet qeverisëse shmangin përgjegjësinë dhe llogaridhënien.
“Bazuar në zbulimet e auditimeve të institucionit për vitin 2021 shkeljet në dëm ekonomik dhe parregullsi dhe shkelje financiare fatkeqësisht tregojnë se aktiviteti qeverisës vazhdon të shfaqë problematika në keq administrimin dhe keq menaxhimin e fondeve dhe të pasurive publike duke shmangur përgjegjësinë dhe llogaridhënien”, tha Shehu.
Po ashtu, ai tha se “vijon keqmenaxhimi në përdorimin e fondeve të burimeve njerëzore si pasojë e largimeve të padrejta nga puna të punonjësve, gjë e cila ka rezultuar shpesh në pagesa penalitetesh, komisionesh dhe tarifash angazhimi përmbarimore”.
“Gjithashtu, në shumë raste janë evidentuar vlera të konsiderueshme të paguara nga njësitë e vetëqeverisjes vendore për largime të padrejta nga puna të punonjësve, të cilat dëmtojnë buxhetin e këtyre njësive”, shtoi kreu i KLSH-së.
