Nga Boldnews.al
Kërkohet një president, mundësisht të jetë femër, sidomos bjonde, (kujdes, nuk duhet ngatërruar me mashkull, që ka flokë të bardhë).
Kandidati, mjafton që të jetë në “radarët” e kryeministrit Edi Rama dhe të mos guxojë t’i kthejë ndonjë ligj pas. Një kukull për kryeministrin që të kontrollojë institucionin e kreut të shtetit. Për të shkuar në një emër që duhet të marrë aprovimin e Ramës, i është lënë si kuitz deputetëve të PS-së, të cilët do të dërgojnë një zarf me tre emrat që mendojnë se janë të denjë për kreun e shtetit.
Lobimet kanë nisur prej kohësh dhe nga radhët e grave, Mimi Kodheli është mprehur që të jetë ajo e “përzgjedhura” e kolegëve deputetë të partisë, por e ka të qartë që vulën në fund duhet dhe do ta japë vetëm Rama. Edhe grave të tjera po u duket vetja kandidate për presidente. Parukeritë VIP në Tiranë, kohët e fundit kanë pasur mjaft punë. Gratë deputete vizitojnë sallonet e bukurisë që të plotësojnë kriterin e “hijeshisë”, sepse e dinë mjaft mirë që imazhi për Ramën është parësor, sa për integritetin politik e profesional nuk ka shumë vlerë pasi në fundin e orarit zyrtar, presidentin që do zgjedhë Rama, lepe-peqe për qeverinë do të jetë.
Mimi Kodheli arriti të futej në Parlament që në seancën e parë, pasi dha dorëheqjen Najada Çomo, e cila edhe pse e dyta në listë, preferoi të rikthehej po si shefe e pavionit të Spitalit Infektiv, për të vijuar “betejën me armikun e padukshëm”.
Kodheli është akuzuar nga opozita që përgjatë viteve 2015-2017 kur ishte Ministre e Mbrojtjes, ka urdhëruar fikjen e radarëve që kontrollonin kalimin detar me qëllim trafikimin e lëndëve narkotike. Në atë kohë ajo mohoi se diçka e tillë kishte ndodhur, por hetimet e mëvonshme treguan se radarët jo vetëm fikeshin kur kalonin tonelata me drogë, por edhe Policia e Shtetit përdorej për ngarkim-shkarkim të narkotikëve.
Emri tjetër i përfolur disi dendur është edhe ai i Pandeli Majkos, por duket se nuk gëzon mbështetjen e Ramës dhe pritet që të digjet që në momentet e para, pavërësisht se deputetët socialistë mund ta kenë në “zarfin e tyre”. Të gjithë deputetët e kanë marrë këtë udhëzim prej një jave, çka tregon se negociatat në emrin e një presidenti konsensual, të pranuar nga të gjithë palët parlamentare është tërësisht fiktiv.
Rama ka vendosur që kreu i shtetit të zgjidhet vetëm me votat e PS-së. Kushtetuta e përcakton që nëse dështojnë tre raundet e para për të pasur president konsensual me mbi 86 vota parlamentare, atëherë ai mund të zgjidhet me vetëm 71 vota.
Ky ndryshim kushtetues ndodhi në vitin 2008 dhe nga palët nënshkruese nga marrëveshja Berisha-Rama u cilësua si: “akt i nevojshëm për të mos krijuar krizë institucionale për të shkuar në zgjedhje të parakohëshme”. Tashmë socialistët e kanë të qartë, që emrat në zarf janë paja e re për kreun e qeverisë i cili pas 24 korrikut do të ketë një president që ti bindet atij dhe partisë në pushtet.
