Superliga e volejbollit të meshkujve ka zhvillu ar dje ndeshjet e dyta gjysmëfinale, duke përcaktuar edhe ekipin e parë finalist për sezonin 2021-2022, që është Tirana. Bardheblutë triumfuan përsëri ndaj Vllaznisë, duke i mundur këta të fundit edhe në Shkodër. Ndërsa në takimin tjetër, Erzeni mposhti Partizanin në pallatin e sportit “Dhimitraq Goga”, duke vendosur baraspeshë në gjysmëfinale, për ta dërguar serinë në takimin e tretë.
VLLAZNIA-TIRANA – Ashtu sikurse takimi i parë, edhe sfida e djeshme në “Qazim Dervishi” u dominua nga Tirana, e cila triumfoi me rezultatin e pastër 0-3. Kryeqytetasve u mjaftoi rreth 1 orë e 10 minuta për të hipotekuar fitoren dhe kualifikimin në transfertë.
Pas një starti me entuziazëm nga vendësit, bardheblutë morën kontrollin duke e fituar setin e parë 18-25. Edhe seti i dytë ishte i ngjashëm, ku përsëri shkodranët e nisën më mirë, por më pas Tirana ktheu gjithçka në favor për të triumfuar 20-25.
Ndërsa seti i tretë u dominua totalisht nga miqtë, të cilët fituan thellë 13-25. Ledion Martio me 14 pikë dhe Nahuel Lapera me 13 ishin lojtarët më rendimentin më të lartë në sulmin e bardhebluve, ndërsa për shkodranët dopioshifër pikësh preku vetëm Nikolin Qafarena me 10.
ERZENI-PARTIZANI – Shijakasit morën një sukses shumë të rëndësishëm duke thyer kampionët në fuqi në një takim shumë të luftuar që zgjati mbi 2 orë. Pasi ishte mundur 3-1 në kryeqytet, Erzeni arriti të triumfonte me të njëjtat shifra në gjysmëfinalen e dytë.
Ndonëse ishte Partizani që e filloi më mirë, duke fituar setin e parë 20-25, më tej të zotët e shtëpisë reaguan dhe kthyen gjithçka në favor të tyre, duke realizuar përmbysjen.
Kështu, shijakasit fituan 25-17 dhe 25- 19 dy setet e radhës, ndërsa në setin e katërt ia dolën sërish, këtë herë pas pikëve shtesë me rezultatin 26-24, duke e mbyllur këtë takim me festë para publikut të tyre të zjarrtë. Ukrainasi Stanislav Azarov, me 23 pikë, ishte shënuesi më i mirë për Erzenin. Shkëlqyen gjithashtu edhe Çullhaj, Loziç dhe Hoxha me nga 13 pikë secili.
Për Partizanin nuk mjaftoi paraqitja fantastike nga Oforah, autor i 24 pikëve.
Tashmë bileta e finales do të ndahet në sfidën e tretë dhe të fundit, që do të luhet në “Feti Borova”.
