Ka përfunduar marrja në pyetje në Prokurorinë e Posaçme kundër krimit të Organizuar dhe Korrupsionit e ish-ministrit, Lefter Koka.
Mësohet se Koka ka thënë para prokurorëve se nuk ka shpërdoruar detyrën por ka zbatuar gjithë procedurën dhe kërkesat ligjore
“Nuk kam shpërdoruar detyrën. Kam zbatuar të gjithë procedurën dhe kërkesat ligjore. Për shpronësimin, është ngritur një Komision i Posaçëm”, mësohet të shprehur ish-ministri.
Koka është i arrestuar për shpërdorim detyre dhe korrupsion lidhur me aferën e Inceneratorëve. Po ashtu, akuzohet për pastrim parash.
SPAK akuzon Kokën se ka përfituar ryshfet në vlerën e 3.7 milionë eurove nëpërmjet kompanive fiktive të zotëruara nga familjarë dhe të njohur të tij. Hetimet disa mujore zbuluan se Lefter Koka favorizoi pronarët dhe administratorët e kompanisë lidhur me koncesionin e inceneratorit të Elbasanit.
