Të martën e javës së ardhshme, Grupi Parlamentar socialist pritet të marrë një vendim nvse Orlando Rakipi, djali i ish-deputetit Aqif Rakipi, i sanksionuar nga Departamenti i Thesarit si i lidhur me grupet kriminale, do të jetë ose jo pjesë e grupimit parlamentar të kësaj partie.
Sot Orlando Rakipi nga salla e Kuvendit tha se vendimi do të apelohej, ndërsa akuzoi Lulzim Bashën si autorin e shpifjeve mbi të cilat babai i tij, ish-deputeti Aqif Rakipi, është vendosur në sanksione nga SHBA.
Madje fjala e Orlando Rakipit u duatrokit nga deputetët socialistë që ishin të pranishëm në sallën e Kuvendit.
“Aqif Rakipi është përmendur dhe përgojuar shpesh kohët e fundit, sidomos nga Lulzim Basha dhe ndonjë njeri i afërt me të. Eshtë demonizuar pa të drejtë dhe është hedhur shumë baltë mbi të. Kam një fjalë për Lulzim Bashën. Ndryshe, po shumë ndryshe nga ti, babai im ka një cilësi që shqiptarët e duan, që quhet burrni”, shtoi deputeti socialist.
Ndonëse amerikanët e akuzojnë babain e deputetit të PS-së si pjesë të grupeve kriminale, influencë të paligjshme në Tiranë e Elbasan dhe shitjblerje votash, Ornaldo Rakipi u shpreh krenar për numrin e votave që arrit të merrte në 25 prillin e 2021.
“Është kjo arsyeja pse ai është votuar. Është kjo arsyeja pse unë kam marrë mbështetje. Sa për akuzat, unë ju ftoj ju, median dhe çdo njeri që është sot i shqetësuar. Jam këtu për të shërbyer e për të justifikuar besimin që më është dhënë nga rreth 16 mijë qytetarë”, përfundoi Ornaldo Rakipi.
Krahas djalit, në sallën e Kuvendit Aqif Rakipi ka edhe dhëndrin e familjes, Saimir Hasalli i cili ende nuk është prononcuar mbi vendimin e Departamentit Amerikan të Thesarit.
Zyrtarisht asnjë prej ligjvënësve të PS nuk ka komentuar sot lidhur me vendimin e Departamentit të Thesarit, ndërsa ajo që pohohet është se një vendim lidhur me këtë çështje do të merret të martën.
Burime nga Partia Socialiste shprehen se vendimi më i mundshëm lidhur me deputetin Orlando Rakipi do të jetë ai i ngrirjes si deputet i PS, deri në sqarimin e plotë të çdo rrethane. Dhe duket se këtë strategji Rama do të përdorë nisur edhe nga fjalimi i sotëm i deputetit Rakipi, i cili paralajmëroi apelimin e vendimit të Departamentit të Thesarit.
Një praktikë të tillë Edi Rama e ka aplikuar më parë edhe ndaj Tom Doshit apo Saimir Tahirit, kur formalisht ato nuk ishin pjesë e grupit parklamentar të PS, nuk merrnin pjesë në mbledhjet e grupit, por që votonin gjithmonë pro nismave të Qeverisë Rama apo atyre të propozuara nga socialistët.
Departamenti amerikan i Thesarit shpalli sanksione financiare për Aqif Rakipin të hënën, duke e përshkruar atë si një “ish-deputet famëkeq nga Elbasani me ndikim të dëmshëm dhe destabilizues në proceset politike në Shqipëri”. Sipas vendimit, Rakipi ka qenë prej kohësh ‘pjesë e krimit të organizuar dhe ka ushtruar ndikim të paligjshëm për të emëruar zyrtarë publikë në Elbasan dhe në Tiranë”.
Në zgjedhjet e fundit parlamentare të prillit 2021, i biri, Ornaldo Rakipi dhe dhëndri i vëllait të tij, Saimir Hasalla u zgjodhën deputetë me mbështetjen publike të Rakipit, duke mbledhur së bashku mbi 27 mijë vota për Partinë Socialiste.
